ORMOC City--Gitug-an sa kadagkuan sa Ormoc City Environment and Natural Resources Department (ENRD) nga liboan ka mga residente sa dakbayan apektado sa sobra nga sand and gravel operations.
Matod ni Rafael Dumalan, labaw sa ENRD, naa sa 29,000 ka mga residente nidangop sa ilang buhatan ug nipaabot sa ilang mga problema.
Sama sa way tubig gikan sa irrigation system nga nisud sa ilang kabasakan, daghan usab ang nangahadlok sa posibilidad sa pagbaha ug pagdahili sa yuta.
Ang gikahadlokan sa mga residente mao usab ang nigawas nga resulta sa inspeksyon sa mga taga Mines and Geosciences Bureau (MGB).
Si Irish Belmonte sa City Fisheries and Aquatic Resources nisugilon nga nigawas usab sa ilang report nga daghan nga mga klase sa isda sa dakbayan ang wa na igkita tungod sa epekto sa sobrang operasyon. Nangaguba usab ang coral reefs gumikan sa maong operasyon.
Giilisan nalang sa CFAR og 1,500 ka artificial reefs.
Base sa listahan sa ENRD, gikan sa 12 ka barangay sa dakbayan ang mga nipaabot sa ilang problema, labing daghan sa Barangay Ipil nga dunay 8,203; Macabug nga 3,352; Bantigue 2,946; Can-untog 2,908; Patag 2,720; Boroc 2,262; San Antonio 1,736; Sumangga 1,387; Quezon Jr 1,224; Mabini 1,150; Hugpa 719 ug Mahayahay 529.
Dugang ni Dumalan, dunay pipila ka mga permit holder sa dakbayan nipadala og petisyon tungod kay mawad-an og trabaho ang ilang kapin 400 ka mga tawo.
Gikwestyon usab sa ENRD nga sa kadugayon, nganong wala ma-regular ang maong mga trabahante.
Hinuon, nisaad ang siyudad nga ilang tabangan ang mga mawad-an og trabaho pinaagi sa Public Employment Services Office (PESO).
Ila usab ubanan sa Department of Labor and Employment (DOLE) ang ubang mga trabahante aron ikunsulta ang ilang wala pagka-regular.
Base sa record sa ENRD, dunay 11 ka permit holders sa sand and gravel samtang duha ang permit holder sa mountain quarrying. Duna usay 21 ka planta sa dakbayan ang ilang inspeksyunon kon duna bay igong mga papeles.
Lakang ni Gomez
Si Mayor Richard Gomez nitubag sa problema sa 29,000 ka mga reklamante. Human sa pagbalanse sa sitwasyon, nipagawas kini og Executive Order 17-A.
Kini nagbawal sa mga sand and gravel Exportation gawas sa Ormoc samtang suspendido usab ang pagkuha, pag renew ug pag-aprobar sa pending permits. Gihangop sa kadaghanan ang gihimo sa mayor nga naaksyonan ang dugay na nga problema sa liboan nga mga Ormocanon.
Matod sa ENRD, niadtong Enero 2020, naa sa 40,000 ngadto sa 45,000 cubic meter ang sand and gravel nga na export gikan sa dakbayan.
Lakip sa executive order nga dunay pagahimuon nga rehabilitasyon sa apektadong mga lugar.
Matod ni Dumalan, dunay iyang kaugalingon nga rehabilitation plan ang Ormoc nga buhaton.
Sa miaging Biyernes, ang komitiba sa Environment and Natural Resources sa Sangguniang Panlalawigan sa Leyte nihimo og committee meeting uban sa permit holders sa sand and gravel lukop probinsya.
Kini may labot sa paghimo og ordinansa nga i-ban ang pag export og sand and gravel sa Leyte. (JKDP)