WA PA gani 24 oras sukad iyang nakuha gikan sa iyang higala ang taudtad na niyang nagustohang sports car, naaksidente na kini.
Ang karambola sa tulo ka mga sakyanan sa Barangay Linao, lungsod sa Minglanilla mga alas 3 sa kaadlawon sa Martes, Marso 10, nakamugnag labing minos unom ka oras nga pagkabara sa trapiko.
Ang aksidente naglambigit sa usa ka sports car, sports utility vehicle (SUV) ug trailer truck.
Si Police Staff Sergeant Mark Rosaroso, traffic investigator sa Minglanilla police station, nisulti sa Superbalita Cebu nga usa ka BMW sports car nga gisakyan sa magtiayong Walter, 47, ug Vanessa Selma nabanggaan sa Mitsubishi Montero SUV nga gimaneho ni Sigried Enriquez, 25, taga Mandaue City.
Si Walter mao ang nagmaneho sa sports car nga ilang nakuha gikan sa iyang higala nianang Lunes sa buntag.
Human naigo sa Montero ang sports car, naigo kini sa trailer truck nga nagpaingon sa Siyudad sa Sugbo.
Ang magtiayong Selma gikan sa ilang balay sa Barangay Tungkop, Minglanilla padung sa usa ka convenience store aron unta mopalit og pagkaon dihang nadumbolan sa Montero.
Tungod sa kakusog sa impact, nisaliring ang sports car hinungdan nga nibanda sa trailer truck nga gimaneho ni Warren Alfanta, 20, taga Barangay Tonggo, lungsod sa San Fernando.
Matod ni Alfanta nga nakabantay siya sa bangga sa pagpaka sa sports car.
Siya naninguha nga di malatayan sa trailer ang awto pinaagi sa paglubag sa manubela.
Matod ni Rosaroso nga si Enriquez niangkon nga siya nakatagpilaw samtang nagmaneho.
Nahigmata si Rosaroso dihang iya nang nadumbolan ang sports car.
Sila si Walter ug Vanessa dakong pasalamat sa ilang kaugalingon nga di grabe ang ilang nahiaguman.
“Pasalamat lang gyud mi kay walay grabe namo sa akong bana. Bahala nalang nang sakyanan. Ang importante nga wala mi maunsa,” sulti ni Vanessa sa Superbalita Cebu.
Si Walter nisulti sa Superbalita Cebu nga niadto lang Lunes, Marso 9, niya nakuha ang sports car.
“Kagahapon pa nako na gikuha sa tag-iya kay nisugot naman nga akong paliton. Pero magsabot pa lang mi sa presyo kay wala pa man mi maghusay,”asoy ni Walter.
Taudtaud nang gihangyo ni Walter ang tag-iya sa sakyanan nga iyang paliton hangtod nga nisugot na niadtong Lunes.
Matod ni Rosaroso nga base sa imbestigasyon, ang sad-an mao si Enriquez.
Si Enriquez wa na prisoha human sa inisyal nga pakigsabot sa iyang amahan sa mga bayranan kanila ni Selma ug tag-iya sa trak.