HUMAN sa duha ka semana nga lugway alang sa mga feed millers nga makapangandam alang sa himuon nga quarantine sa tanan nga mga plant-based raw materials gikan sa Luzon, Mindanao ug Rehiyon 8, laing executive order ang giluwatan ni Cebu Governor Gwen Garcia.
Ang EO No. 8 nga gipagawas sa gobernadora naglatid sa mga protocols alang sa ipahigayon nga quarantine aron pagpugong sa pagkatap sa African Swine Fever (ASF) sa lalawigan.
Kini atol sa gipahigayon nga panagtigom sa mga feed millers sa lalawigan sa Sugbo kagahapon, Marso 10, 2020.
Niadtong Pebrero 24, 2020 una nang nasabotan sa mga feed millersang pagpaubos sa mga raw materials sa 20 ka adlaw nga quarantine. Apan nipadayag ang mga feed millers nga kini mapatuman hayan kuwangon ang ilang lugar nga giandam kon ipaabot pa og 20 ka adlaw ang pag-quarantine.
Lakip usab sa gikabalak-an sa mga millers ang epekto niini sa ilang produksyon ug sa mga nag trabaho sa ilang mga kompanya.
Tungod niini, nagkahiusa ang mga negusyante og mogamit sa bag-o nga protocol.
Sanglit 60 porsyento man nga mais ang gamiton sa paghimo og feeds, uyon sila nga ipaubos sa 20 ka adlaw nga quarantine period ang maong materyales.
Apan gitugotan kini nga mo-ubos pa ngadto sa 15 ka adlaw kon makapasalig ang mga millers sa pagkuha og insakto ug balido nga mga dokumento gikan sa Department of Agriculture (DA) sa rehiyon kon asa naggikan ang materyales ug ang certification gikan sa Provincial Agriculture Office (PVO) pagpamatuod nga luwas sa ASF ang mga produkto.
Samtang alang sa uban nga raw materials - sama sa soybean, feed wheat, peas ug uban pa - ipaubos lang kini sa 15 ka adlaw ug kinahanglan usab nga mokuha sa insakto nga dokumento.
Matod ni Garcia nga gikinahanglan ang pagtinabangay og hinanali nga lakang kalabot ning maong isyu tungod kay possible kining mokatap kon dili hatagan og pagpakabana.
Ang maong kamandoan, mo-epekto sugod sa Marso 23, 2020.
Hinuon ang mga plant-based swine products, sagol sa feeds ug laing raw materials nga gikan sa gawas sa nasud ug kadtong mga imported mamahimo gihapon nga makasulod dinhi sa Sugbo. (ANV)