KARAANG building sa barangay hall sa Banilad, siyudad sa Sugbo libre nga ipagamit sa Mobile Patrol Group sa Cebu City Police Office.
Mihimo na og kasabutan ang barangay Banilad, barangay Kasambagan ug ang hepe sa Cebu City Police Office aron magamit gilayon ang maong edepisyo nga anaa mahimutang sa Banilad road.
Kining maong building wala na gamita, hinungda nga ang kapitan sa barangay Banilad nga si Dennes Tabar nakahukom nga himuon kining usa ka police detachment nunot sa nagkadako nga papulasyon sa ilang dapit.
Matod niya nga dili lang ang Banilad ang makabinipisyo sa presensya sa mga police, kon dili lakip na ang mga silingan niining barangay sama sa Apas ug Kasambagan.
Ang memorandum of agreement naglatid nga samtang wala pa gamita sa barangay ang building, ang police lang una maoy mo-okupar niini samtang tunga-an sa barangay ug CPPO ang bayranan sa kuryente.
Matod ni Tabar nga gihangop ug gikalipay usab sa CCPO mao ang libring pag gamit niini sa tubig.
“Ang atung purpose gyud ani para gyud sa PNP, joint project ni sa Apas, Kasambagan ug Banilad nya diri lang nato gibutang kay kita man ang naay area. Dako ni’g impact sa atung area ug sa silingang barangay kay tupad raman ang atoang barangay. Dako nig impact sa police visibility,” matod ni Kapitan Tabar.
Si Police Colonel Engelbert Soriano, ang hepe sa CCPO, mapasalamaton usab kaayo.
Dili lang ang mobile patrol group kon dili makagamit niini ang ubang unit sa kapulisan. Mahimo usab nga anha sa maong buhatan mapa-blotter ang mga residente sa mga nahisgutang dapit nga adunay ipadangat nga reklamo.
“Depende yan sa magiging arrangement namin pero ayaw ko kase na may pupunta dito na sibilyan tapos sabihing magpa blotter sila tapos sabihing pupunta ka sa Station 4. Parang medyo hindi masyadong epektibo, gagawan natin ng paraan na pwede dito magpa blotter,” matod ni Soriano.
Si Cebu City Association Barangay Council President Franklyn Ong andam usab nga moabag sa mga gamit sa mga police sama sa aircon ug uban pa.
Alang kaniya nga dako kaayo ug ikatabang sa pagpabilin nga malinawon ang barangay kung aduna kanunay ang presensya sa kapulisan. (AYB)