SI DAVAO City First District Representative Paolo "Pulong" Duterte misang-at og balaudnon batok "bulk-cash" smuggling sa nasud luyo sa kontrobersiya sa minilyon nga dolyar nga gipasud sa mga Chinese nationals sa nasud.
Kini mao ang House Bill 6421, kun "Anti-Bulk Cash Smuggling Act of 2020, nga dunay mandato nga si bisan kinsa nga tawo kinahanglan nga modeklara pinaagi sa "proper reporting" sa kantidad mga P500,000 cash o motaas pa niini nga i-transport sud ug gawas sa Pilipinas.
Ubos sa sugyot-balaudnon, ang si bisan kinsa nga nagplano nga modala og dako nga kantidad sa salapi kinahanglan nga mokuha una og clearance gikan sa Bangko Sentral ng Pilipinas (BSP).
Nakalagda sa balaudnon nga ang si bisan kinsa nga pakyas nga motuman sa maong kasabutan sa pagdala og P500,000 o kun sobra niini, mamahimong mapriso sud sa di moubos sa usa ka tuig ug di mosobra sa lima ka tuig.
Momulta ang makasupak sa di moubos sa P100,000 ug di mosobra sa P500,000.
Ang smuggled bulk cash ma-forfeit dayon subay sa ipahigayong inspeksiyon sa Bureau of Customs (BoC), suma sa bill.
Ang government officials ug mga employees kinsa kakunsabo o mosupak niini makamulta og dili moubos sa P50,000 ug di mosobra sa P200,000 ug mapriso sud sa unom ka bulan ug di mosobra sa usa ka tuig.
Ning balaudnon, makadawat sab og ganti ang si bisan kinsa nga makatug-an nga dunay gi-ismagol nga salapi diin anaa [1 percent] ang iyang madawat gikan sa total amount sa cash smuggled o P200,000 kung ubos ang kantidad.
Si House Committee on Appropriations chairman ug ACT-CIS Representative Eric Yap ang co-author sab ning HB 6412.
"Since it would be difficult to trace and document cash transactions, the money brought in into the country may be used for illegal activities. Thus, there is a significant need to increase our vigilance over money laundering," ingon sa batan-ong Duterte.
Suma sa awtoridad ang mga Chinese nationals nakadala na og mosumada og US$368 million sa nasud sukad 2019. (Jeepy P. Compio)