MADAYON ang mga graduation ceremonies sa mga tunghaan karong bulana ug sa bulan sa Abril, apan sa mga tunghaan lamang kini himuon ug limitahan ang mga mosaksi nga kabanay ug di dalhon labi na kadtong dunay mga respiratory problems.
Kini ang gibutyag ni Department of Education (DepEd)-Davao spokesperson Jenelito Atillo atol sa pakighinabi sa Superbalita Davao kagahapon, Marso 10.
"Wala ta mag-cancel og graduation or recognition, basta confined lang sa school, bawal mogawas ug i-seguro sa school nga dili patambungon ang tanang mga nagpakita og sintomas sa respiratory problems," butyag ni Atillo.
Sumala ni Atillo nga kinahanglan maseguro ang tanang protective measures sa pagpahigayon sa graduation rites, moving-up ceremony ug commencement exercises.
"Dapat i-seguro pod nga ang tanang protective measures must be in placed including ang pag-limit sa number of spectators," ingon ni Atillo.
Dugang sa opisyal nga kadtong walay mga labot, gawas sa pamilya sa mo-gradwar magpaabot nalang sa gawas sa reception.
"Kadtong mga walay labot gawas sa pamilya, sa reception na lang maghulat, kung naay reception, usbon ta, inside the school lang gyod ug ma in place tanang protective measures sa pagpahigayon sa maong mga aktibidad," sumpay sa opisyal.
Una niini, gikabalaka sa mga ginikanan ang mga migula nga istorya nga gikansela sab ang mga graduation rites aron malikayan ang local transmission sa coronavirus disease (Covid-19).
Ang kabalaka nga di mahinayon ang mga graduation rites subay sa gipagula nga guidelines number 4 sa Davao City Government.
"In the absence of an official advisory from the Department of Education and Commission on Higher Education, schools are mandated to implement distance learning and provide home assignments and worksheets, accelerate their school calendar to shorten the school year and postpone recognition and graduation activities until after the Public Health Emergency is lifted or withdrawn," sa guidelines.
Kahinumdoman, Marso 8, si Pangulong Rodrigo Duterte nagpagula og Proclamation 922 nga nagdeklara nga ipailawom ang nasud sa usa ka State of Public Health Emergency ug ang Alert Level 4, Code Red sa Department of Health.
Ning kasamtangan, anaa na sa 35 ka mga kompirmadong kaso sa Covid-19 sa Pilipinas suma sa DOH.
Ang Covid-19 mahimong makamatay alang sa mga tiguwang, ang "immunocompromised," ug kadtong nagpailawom sa medical condition apan 80 porsiyento sa mga kaso sa tibuok kalibutan nagpakita og taas nga tsansa sa pagrekober "without needing special treatment," sumala sa World Health Organization (WHO).
Matud sa WHO nga ang Covid-19 symptoms naglakip sa kalintura, kakapoy, ug dry cough. Ubang mga pasyente dunay mga bationg kasakit, nasal congestion, runny nose, sore throat o diarrhea. Ang bag-ong respiratory disease nibilin og 3,800 patay ug nakatakod og 110,000 sa tibuok kalibutan.