GI-OBSERBAR karong adlawa, Marso, ang 18th World Water Day subay sa deklarasyon sa 1992 United Nations Conference on Enviroment and Development (UNCED) sa Rio de Janeiro, Brazil.

Ang World Water Day gitumong sa pagpakaylap sa edukasyon bahin sa kamahinungdanon sa tubig, pagpanalipod ug pagpalambo sa iyang tinubdan taliwa sa paspas nga kalamboan sa katilingban ning modenong panahon.

Gibanabana sa United Nations (UN) nga 1.1 bilyunes sa mga tawo sa kalibotan ang ninggamit sa di luwas-imnon nga tinubdan sa tubig.

Click here for Election 2010 updates

Imbes makatabang sa panglawas, ang tubig nga giinom mahimong sinugdanan sa laing sakit.

Busa ang World Water Day 2010 nagtutok sa pagpataas sa kaamgo sa maayong kalidad sa tubig ubos sa tema nga ‘Clean Water for a Healthy World.’

Dinhi sa Pilipinas, labi na sa Sugbo, ang pag-obserbar sa World Water Day haom kaayo karon tungod sa nag-ung-ong nga dakong krisis sa tubig mugna sa El Nino phenomenon.

Samtang, daan nang nasayran sa daghang mga pagtuon nga ang Sugbo way igong tinubdan sa tubig ug moabot ang panahon nga maglisod ang mga Sugboanon sa pagkuha og luwas nga tubig ang umaabot nga henerasyon kon way igong pagkabana nga buhaton karon.

Nasayod kita nga ang labing dako nga tig-apud-apod sa tubig sa Sugbo, Metropolitan Cebu Water District (MCWD), maoy nanguna ning adlawa sa pagsaulog sa World Water Day aron mapaasdang ang kawsa bahin sa tubig pinaagi sa pagmugna og mga kalihokan nga makapadani sa pagtagad sa publiko.

Apan naa sa matag usa kanato ang mas dunay dakong kaakohan kay kon atong hunahunaon, kini alang ra usab kanato ug atong umaabot nga kaliwat.

Ug ang atong pakabana, sama sa pagdaginot sa tubig, di lang karong adlawa apan kada adlaw ang World Water Day.