SUPERBALITA CEBU

Konsehal sa Ginatilan gipatay

PATAY ang babayeng konsehal sa lungsod sa Ginatilan, habagatang Sugbo, human pusila sa wala pa mailhing mga mamumuno pasado alas 12 sa Miyerkules sa udto, Marso 11, gawas sa munisipyo.

Ang biktima giila nga si Maria Liza Birongan Toledo, kinsa nakaangkon og mga samad pinusilan sa kalawasan.

Si Toledo giingong naa sa listahan sa kapulisan nga nalambigit sa illegal drugs kay kapuyo siya kanhi ni Norberto Antiquando, kinsa toa na sa National Bilibid Prison human makombikto sa kasong murder sa pagpatay sa usa ka Hapon sa Barangay Banilad, Dakbayan sa Sugbo, niadtong 2001.

Ginsentensyahan siya ug iyang kaubanan nga mabilanggo og 20 ngadto sa 40 ka tuig.

Matod ni Police Lt. Lito Tadique, hepe sa Ginatilan Police Station, gikan nitambong sa session si Toledo, apan giatangan sa wa pa mailhi ug matinong gidaghanon sa armado nga mga tawo sa paggawas ug gipusil makadaghan.

Matod ni Tadique nga kalit ang panghitabo.

Human sila makadungog sa buto-buto sa armas, dali sila nga niresponde, apan wa na nila maabti ang mga killer.

Daling gidala si Toledo sa Malabuyoc District Hospital, apan alas 2:35 sa hapon, nakabsan sa kinabuhi.

Ilang gisusi ang kuha sa close circuit television (CCTV) camera sa gawas sa munisipyo, apan wa makita ang killers.

Gitug-an ni Tadique nga si Toledo lang ang makita sa video nga gipusil ug dayong katumba.

“Sa among nakita sa CCTV, siya ra man ug katong iyang bata-bata ang kauban nga naglakaw. Kalit ang buto, wala gyud mi nakitang tawo nga nakuha sa CCTV,” matod ni Tadique.

Dugang ni Tadique nga nangita pa sila karon sa mga nakasaksi sa krimen, ilabi na sa makahulagway sa gisakyan sa killers.

Imbestigar

Si Police Colonel Roderick Mariano, hepe sa Cebu Provincial Police Office (CPPO) nimando sa kapulisan sa Ginatilan nga palawman pa ang imbestigasyon.

Di pa sila makatumbok unsay motibo ug anggulo sa krimen, apan dako ang posibilidad nga personal ang hinungdan.

Iyang gipasusi ang cellular phone ni Toledo ug kuhaan sa pamahayag ang mga kabanay kon wa bay nadawat nga hulga ang konsehal sa wa pa banhigi.

“Pina pa check ko pa yung motive kung bakit siya binaril. Gagawa tayo ng background at back tracking sa kanya. Yan ang gagawin natin,” matod ni Mariano.

Di usab mokompirmar si Mariano kon naa ba sa listahan ni Duterte ang ngalan ni Toledo tungod kay iya pang gipasusi sa iyang intelligence officer.

Illegal Drugs?

Usa ka kasaligang tinubdan sa Camp Crame nitug-an sa Superbalita Cebu nga nalambigit sa illegal drug trade si Toledo sa probinsya sa Sugbo.

Giingong ang iyang supplier mao ang iyang kanhi live-in partner nga si Antiquando.

Human masulod sa NBP si Antiquando, nakatukod kini og drug group sa Sugbo.

Matod sa tinubdan nga si Antiquando ang naggasto sa iyang kandidatura sa pagka konsehal sa lungsod niadtong 2019 elections.

Ang tinubdan niingon nga ang drug personality nga si Maria Liza Dumaboc nga naa sa listahan ni President Rodrigo Duterte ug si Toledo usa ra.

“Si Maria Liza Toledo at si Maria Liza Dumaboc is the same person,” matod sa kasaligang tinubdan. Siya ang giingong supplier sa ilegal nga drugas sa lungsod ug mga silingag lugar sa Ginatilan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!