Sugilanon: Gugma sa kaaway

NAKAILA ni Bea si Richard sa mga selda sa bilanggoan. Nag-ulang ang ilang pangedaron. Batan-on pa si Richard sa panuigon nga katloan ka tuig. Samtang siya anaa na magkumpayot sa panuigon nga kap-atan ka tuig. Wala niya damha nga mopitik ang iyang kasingkasing sa mga pahiyom ni Richard nga nabilanggo sa pagpanulis ug pagpatay sa iyang ig-agaw nga negusyante didto sa Mindanao.

“Kawhaan pa ang akong panuigon dihang giagni ako sa silingan namong mga tulisan,” asoy ni Richard sa iyang kinabuhi. “Naaghat ako kay nagdako akong nag-inusara sa akong apuhang babaye nga makililimos. Namatay siya ug nag-inusara na lang ako sa pagpakilimos sa kadalanan. Wala na ako makatungha pa. Ang nakat-onan ko sa panahon sa kagutom mao ang pagpangawat kay nihit ang mga limos kong madawat. Nahiuban ako sa mga silingan namong kawatan ug tulisan. Mao na kini karon ang nahitabo kanako.”

Iyang gitugkad ang giladmon sa kaso ni Richard. “Nakapatay ka sa inyong pagpanulis?”

Nagpanglingo si Richard. “Nahatagan akog pistola sa kauban kong mga tulisan. Una ko kadtong paghupot ug pagpabuto sa pistola. Maskin wala pay kasinatian, nagpabuto ako kay gitirahan kami sa mga pulis ug mga sekyu.”

“Wala kay nasayran kon si kinsa ang gipusil ug gipatay mo?”

“Ambot lang, uy! Giyera god. Basta nakatira lang sa pistola.”

Namatay ang iyang ig-agaw sa pagpanulis sa usa ka banko sa Mindanao. Negusyante ang iyang ig-agaw ug naatol didto kini sa banko niadtong higayuna ug maoy usa sa napagan sa pinusilay. Nagdumot ug nasilag ang ilang kaliwat ug kadugo sa nahitabo. Ug ania karon ang usa sa mga tulisan niadtong hitaboa. Ulahi na siyang nasayod nga si Richard maoy usa sa mga tulisan dihang nahiuban ang igsuon sa iyang ig-agaw nga napatay - si Robert.

Pareho sila si Robert nga nagtrabaho sa dakong kompaniya sa ilang pamilyang mga negusyante ug industriyalista. Isip espirituhanong pag-alagad sa simbahan, nahiuban si Bea, ingon man si Robert, sa mga kalihukan sa simbahan nga moduaw sa mga masakiton, sa mga tiguwang, sa mga binilanggo, sa mga batang wa nay mga ginikanan ug nag-inusara sa kadalanan ug nagpakilimos. Manghatag pod silag mga gasa sama sa mga pagkaon ug mga sapot. Mao nga dinhi gikaila ni Bea si Richard nga nakakabig sa iyang pagbati. Angay ba usab siya nga mahigugma kang Richard?

Gisuginlan ni Bea ang iyang kabanay ug kadugo bahin kang Richard. Halos ang tanan misupak ug mas maayo na lang kuno nga magpabilin siyang dalagang guwang. Apan may usa ka linalang nga naghatag kahayag sa iyang pagbati ug hunahuna, si Robert.

“Gikahimamat ko si Richard sa bilanggoan. Duha kitang nag-alagad sa simbahan Inosente siya tungod sa tumang kakabos. Di na mahinungdanon kon iya bang napatay ang akong maguwang nga lalake sa pagpanulis. Mahinungdanon nga nagbinuotan siya, relihiyuso siya ug nagtungha nga ma-edukar sa libreng kurso sa kolehiyo. Labaw sa tanan, tinud-anay ang iyang pagbati diha kanimo.”

Nakahilak si Bea ug nakagakos kang Robert. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph