WALA man ko maulaw sa akong nahiaguman tungod kay dili man ni heinous crime. Ang akong sayop tungod kay nahigugma ra ko,” matod pa ni Police Major Ildefonso Miranda Jr., kanhi hepe sa Argao Police Station.
Nasikop si Miranda sa mga alas 11:20 sa gabii niadtong Huwebes, Marso 5 kay nasakpan sa akto nga nakigdulog sa usa ka drug detainee, si Jean Claudia de Guzman alias Tarya Jr., 29, sa usa ka kama sulod sa iyang opisina. Laing drug detainee, si Brenda Cutillar, 40, natulog usab sa opisina ni Miranda.
Tungod niini, gipasakaan si Miranda og kasong administratiba ug tulo ka kasong kriminal niadtong Lunes, Marso 9. Mao kini ang kalapasan sa Article 156 ug 210 sa Revised Penal Code (RPC) ug kalapasan sa Republic Act No. 3019, ang Anti-Graft and Corrupt Practices Act. Hisgutan nato ang uban niini.
Ang Art. 156, RPC, nagkanayon, “Delivery of prisoners from jails. — The penalty of arresto mayor in its maximum period of prision correccional in its minimum period shall be imposed upon any person who shall remove from any jail or penal establishment any person confined therein or shall help the escape of such person, by means of violence, intimidation, or bribery. If other means are used, the penalty of arresto mayor shall be imposed.”
Duha ka butang ang gisilotan ning maong balaod, ang “removal of a person from jail” ug “helping the escape of such person.” Sa laktod, gipagawas o gipaeskapo ang usa ka tawo gikan sa prisohan.
Nakaeskapo ba ang babaye nga gikadulog ni Miranda? Maka-eskapo kaha labi na kon gitandayan? Gipagawas ba ni Miranda ang babaye sa prisuhan? Unsaon paggawas sa babaye nga nagdulog man sila sa sulod sa iyang opisina sa mao mismong prisohan.
Ang Art. 210, RPC, nagkanayon, “Direct bribery. — Any public officer who shall agree to perform an act constituting a crime, in connection with the performance of this official duties, in consideration of any offer, promise, gift or present received by such officer, personally or through the mediation of another. xxx”
Dinhi, ang usa ka public officer niuyon sa buhat sa usa ka krimen o di krimen labot sa iyang opisyal nga gimbuhaton tungod sa usa ka tanyag, saad, gift or present nga iyang nadawat. Ang silot prision mayor medium ug maximum period ug multa nga di molabaw sa tulo ka pilo sa balor sa “gift” nga nadawat.
Unsa man kaha ang gift nga nadawat ni Miranda? Duna bay balor ang iyang pakigdulog sa babaye? Kon managhigugmaay silang duha, ang ilang panagdulog di na matawag nga gift, panagsawo na kini sa gugma.
Lain pang tubagon pa ni Miranda mao ang kalapasan sa RA No. 3019 ug ang kasong administratiba batok kaniya. (edbarrita@gmail.com)