DAGHAN ang sugyot karon nunot niining gikataho nga local transmission o aduna nay mga Filipino nga gitakbuyan niining gikalisangan nga coronavirus disease (Covid 19). Mokabat na sa 33 ka mga tawo ang natakbuyan ug kadaghanan atoa ra sa Metro Manila.
Gani ang Department of Health (DOH) miisa na sa Code red alert nga estado sa virus ug mideklarar na si President Rodrigo Duterte og State of Public Health Emergency og gipahugtan na ang mga protocols o mga lakang aron gyud kapugngan ang pagkuyanap sa virus dinhi sa nasud. Kon ang taga DOH pa ang pasultihon, ila nga istrikto nga gisunod ang tanang protocols aron kapugngan ang pagkuyanap sa maong balatian.
Mitumaw ang mga sugyot sama sa pagpahigayon sa dinalian nga pagsira sa public schools ug pagpahigayon og sayo nga graduation aron dili matakbuyan ang kabataan. Dili na lang kuno tiwason hangtod sa Abril 3 nga mao ang graduation. Ang tanang sports events sama sa regional meets ug Palarong Pambansa ikanselar na lang. Aw, kining mga sports events puwede man ning dili na ihinayon. Wa nay Palaro. Kon way Palaro, wala nay rason nga aduna pay regional meets.
Kon atong tapusan ang eskuwela karon dayon, para nako i-case to case basis lang ni. Dili ni ipakite o package ang cancellation sa tibuok Pilipinas. Dili man tanang bahin sa nasud ang gihulga sa Covid 19. Asa to nga lugar nga adunay kaso sa Covid 19 mao ray angay nga i-cancel na ang pag-eskuwela. Karon bitaw ang Metro Manila ra man ang suspendido ang klase. Iapil diay ang Cebu nga wala may kaso sa corona virus?
Okey, emergency man ni. Pero dili man tanan ang naapektuhan. Gani ang DOH 7 miingon man nga walay nagpositibo dinhi sa region 7. Unya atong iapil diay sa pagputol sa klase dinhi sa rehiyon nga wala may local transmission? Sama god sa gubat sa Marawi ug pagbuto sa bulkan sa Taal, ang mga lugar lang nga giderektang naapektuhan ang mikanselar sa ilang mga klase. Kay nagtuo sila nga kon sayo nato buhian ang mga bata, magpuyo lang na sila sa balay. Dili uy. Magsuroy-suroy kana sa malls ug dilikado na hinuon nga didto matakbuyan. (bobbygnalzaro@gmail.com)