BANSALAN, Davao del Sur -- Nialma ang mga konsumante human nagnihit ug kung aduna may namaligya og face mask sa online hilabihan kamahal ang presyo niini.
Ang online seller nga si Marivic, 24, nagbutyag nga tag P1,000 na daan ang ilang kumprada sa usa ka box nga surgical mask mao nga tag P20 na sab ang ilang retail sa matag usa.
Gitataw sab ni Arlyn Campo, 27, nga gihimo niyang sideline ang pagpamaligya og surgical face mask sanglit wa nay mapalit sa botika.
Anaa lamang sa tag P70 ang box niini kaniadto ug tag P5 ang buok apan human nikatag ang coronavirus disease (Covid-19), nikalit sab pagsaka ang presyo niini.
Apan matud sa nars nga si Jenny, mas maayong panapton nga face mask ang gamiton ug butangan lamang og gapas sanglit molungtad pa sa taas nga panahon ang paggamit niini.
"Kana man gud surgical mask kay three hours lang na siya magamit unya ilabay na, so di gihapon effective," niya pa.
Giawhag sa mga personahe sa panglawas ang publiko nga matag karon ug unya gyud nga manghugas og kamot ug mogamit og alcohol o kaha sanitizer.
Di sab pasul-obon og face mask ang mga tawo nga himsog og lawas.
Samtang wa pa masumpo ang Covid-19, mas maayo sab nga maglikay una sa mga pampublikong lugar. (Orlando B. Dinoy)