KIDAPAWAN CITY -- Padayon ang gihimong pagpaniid ug paghatag tubag sa Department of Health (DOH) sa 15 ka tawo nga nahibiling persons under monitoring (PUM) sa tibuok Soccksargen gumikan sa coronavirus disease (Covid-19).
Sa pinakaulahi nga datus nga gipagawas sa DOH gikan Enero 29 hangtud sa kasamtangan, moabot na sa 88 ang natala nga PUM sa rehiyon ug 14 niini nakahuman na sa ilang 14-day home quarantine.
Gikompirma sa DOH-Soccsksargen nga unom niini nagagikan sa North Cotabato, walo sa South Cotabato ug usa sa Sultan Kudarat.
Samtang nakatala sab og lima nga patients under investigation (PUI) ang Soccsksargen diin upat niini negatibo sa sakit human ang confirmatory testing ug usa ang nagpabilin pa sa balay tambalanan.
Gipamahayag ni Health Education and Promotion officer Arjohn Gangoso nga halos taga adlaw nadungagan ang ihap sa PUM sa rehiyon gumikan daghang Pinoy ang miuli sa nasud gikan sa abroad ug mga lugar nga dunay nagpositibo sa Covid-19.
Nagtinabangay karon ang provincial health offices, city/rural health units, mga pribado ug pampubliko nga ospital uban ang nagkadaiyang ahensiya sa gobyerno sa gipakusog nga disease surveillance, istrikto nga pagsusi sa sakit lakip na control implementation sa tibuok rehiyon.
Matag ospital sa mga probinsiya dunay mga isolation room alang sa mga pasyente nga dunay sintomas sa Covid-19.
Hinuon, hangtud karon luwas gihapon ang tibuok rehiyon sa maong sakit.