SUBAY sa nagkataas nga kaso sa coronavirus disease (Covid-19) sa nasod, gipahugtan na usab sa Cebu Port Authority (CPA) ang ilahang seguridad ingon man nakaalerto na ang tanang pantalan sa Sugbo aron malikayan ang pagkaylap pa sa maong sakit.
Kon namatikdan na sa publiko ang mga gihimo sa malls nga handheld thermometer scanning, buhaton na usab kini sa mga pantalan sa Sugbo kini matod ni CPA General Manager Leonilo Miole.
Sa matag pasahero nga mosulod sa mga terminal sa mga pantalan, himuon na nila ang non-contact thermometer scanning ingon man sigurohon sa manager nga aduna’y sabon ang matag pansayan aron magamit sa pasahero sa paghugas sa ilahang kamot.
Magbutang na usab sila og alchohol-based hand sanitizers sa mga payment counter, main entrances, office doors, passengers terminal walkways ug pre-departure areas.
“CPA continues to closely coordinate with our partner agencies especially with DOH in putting into place various frontline defense to prevent the possible entry of the virus in Cebu province via our ports. In fact, we already requested DOH Regional Office 7 to deploy medical officers and provide a standby ambulance in our ports,” matod ni Miole.
Aron mas makasabot usab ang publiko kabahin sa Covid-19 aduna’y mga information sheets ug IEC materials gikan sa Department of Health ang mamahimong mabasa sa mga pasahero.
Andam na usab ang temporary isolation rooms ug holding rooms sa pantalan aron aduna’y kabutangan kadtong makitaan og sintomas sa Covid-19.
Wala na usa’y mga barko gikan sa laing nasod ang gipadunggo kon wala’y clearance ug permit gikan sa Bureau of Quarantine ug Bureau of Immigration.
Gipasul-ob na usab nila ilahang mga frontline personnel nga mosul-ob sa personal protective equipment (PPE) susama sa surgical o N95 mask aron mapanalipdan ang kaugalingon batok Covid-19.
Gidili na usab ang pagpangluwa sa bisan asa nga parte sa pantalan ingon man tanang port police mao ang mopatuman niini aron dili kini buhaton sa publiko.
“We are requesting the public to please support our efforts, comply with the enforced port protocol and most importantly practice personal protective measures such as hand hygiene, social distancing, and proper cough etiquette to help put a stop or slow down the spread of the virus,” si Miole nagkanayon. (HBL)