DEAR Tita Heart
Maayong adlaw kanimo Tita Heart ug sa mga suki sa Superbalita. Ako si Erin taga CdeO. Nagsulat ko tita kay naa koy problema bahin sa akong kaipon nga nakamabdos og lain babae. Gisabot nako siya tita kay 3 years nami ipon pero wala mi kaanak. Karon nga nakaburos siya nagtoo nako nga ako ang problema. Tita akong kaipon sige ingon ako gyod iyang love ug aksidente lang ang nahitabo nila sa girl. Angayan ba ko motoo tita? Tambagi ko tita heart kay libog kaayo ko karon.
Erin
***
Hello Erin,
Ang imong kaipon lamang maoy bugtong nasayod sa iyang gibuhat nganong nakaburos apan nagtoo ko nga dili kadto aksidente. Posible iyang gihimo aron pod makakita siya iyang liwat. Sa imong giingon nga gisabot nimo siya kay wala pod nimo siya nahatagan og anak imo gyod kana nga desisyon. Andama lang daan ang imong kaugalingon nga puhon mogawas iyang anak dili na tanan iyang atensyon anaa kanimo, andama imong kaugalingon nga aduna gihapon silay komunikasyon sa babae kay inahan baya sa iyang anak. Kung tinoud love ka niya dili pod unta siya maghimo og butang nga masakitan ka. Pero kay iya man gipugos nga ikaw iyang love obsebahi lang.
Tita Heart