MORA mag gitungo o gimaldisyon kas mga pari! Kay sa wa pa ka magsigeg ‘post’ sa Facebook pagsaway sa kalihukan sa mga Katoliko, wa man ka masakit!” ni Nova samtang nag-atiman kang Celso, iyang kapikas, sulod sa ‘emergency room’ sa Green Meadow Medical Center.
Ning sayong kahapunon gitauran si Celso sa nars og mga ‘wire’ sa lawas kay eksaminon ang iyang kasingkasing pinaagi sa EKG machine. Naglingkod ra siya sa katre samtang gipapitlan ang iyang tiyan ug dughan sa mga alambre. Sutaon kon unsay depekto sa iyang kasingkasing.
“Kon kining sakita bunga sa ilang tungo o maldisyon kanako. Gahom ni Satanas ang nihatag niini! Kon hinatag ni ni Satanas, ang Diyos akong sampiton aron mahanaw akong sakit. Ang Ginuo ra akong pabut-on kon maayo ba ko o dili. Gisurender na nako sa Diyos akong kinabuhi. Ang Iyang pagbuot maoy matuman,” ni Celso nga luspad ug luya na kaayo.
Usa ka retirado nga abogado si Celso. Wala na siya manglaban sa edad nga 63. Nagsangyaw na lang siya sa mga pulong sa Bibliya. Bibliya nga Katoliko ang iyang gitun-an ug mobasa sab siya sa Bibliya nga King James Version.
Misaad siya sa Ginuo nga inig-abot niya sa edad nga 60, mosangyaw na siya sa Balaang Pulong. Sulod sa 40 ka tuig na siyang nagtuon sa Bibliya ug nakita niya ang mga sayop sa simbahang Katoliko. Ang Katolikong Bibliya mismo nagpasabot nga ang Diyos dili gusto nga ang tawo mag-ampo og imahe. Daghang imahe ang giampoan sa mga Katoliko: Black Nazarene, Sto. Nino, Crucified Jesus, Virgin Mary ug ang mga imahe sa mga santos. Sumala pa ni Celso, ang pagbuhat sa mga tawo pagyukbo og imahe nakapahimuot kang Satanas ug nakapalagot sa Diyos. Daghang mga mensahe nga gi-post niya sa ‘social media’, lakip na ang pag-ingon nga, “Si Satanas naa sa Vatican!”
Nagsangyaw si Celso sa Tinuod nga Relihiyon sumala sa Santiago 1:27 (James 1:27). .
“Kon tinuod pang naglagot ang Diyos anang pagyukbo sa mga tawo sa mga imahe, gikastigo na unta niya. Daghan man hinuon ang gimilagrohan!” ni Nova.
“Kon kastigo ang hisgutan, kana diayng mga bagyo, linog, pagbuto sa bulkan, baha, lunop, disgrasya, virus, epidemic, mga sakit sa hayupan, climate change ug global warming,” ni Celso.
“Unya ang mga milagro?” ni Nova. “Mga milagro na ni Satanas aron sila mangailad nga may gahom ang mga imahe!” ni Celso.
“Kon ang Diyos wala modirekta og pangasaba o pagkastigo sa mga nag-ampo sa imahe, unsa may katungod nimo sa pagsaway ning kalihukana?” ni Nova.
“Sa Bibliya, tataw ang pulong sa Diyos nga nagdili sa mga tawo sa pagyukbo sa mga diyos-diyos. Ang motahod sa iyang kasugoan may mga ‘blessing’ ug ang mosupak may mga ‘curse’,” ni Celso.
“Unya ikaw, nganong nasakit man ka? Dili ‘blessing’ ang imong nadawat; hinunoa, ‘curse’, tunglo o maldisyon,” ni Nova nga mibukhad sa iyang palad.
“Natural ra nga moabot ang higayon nga masakit ang tawo. Di ko motuo nga hinatag ni sa Diyos. Posible, gikan kini ni Satanas. Apan wa man ko mahadlok ini!” ni Celso.
“Ngano man?” ni Nova.
“Ang Diyos nay magbuot sa akong kinabuhi. Giingnan ko Siya nga kon sa iyang tan-aw wa na koy kapuslanan dinhi sa kalibutan, angay na kong mamatay. Pero, kon may kapuslanan pa ko, mihangyo ko nga Iyang ayuhon akong balatian. Instrumento niya sa panambal ang doktor,” ni Celso
Nabalaka pag-ayo si Nova sa kahimtang ni Celso, apan nasuta niya nga ang baruganan niini dili matuis. Gipiyal na niini sa Diyos ang iyang kinabuhi. Hilom siyang nag-ampo sa Diyos.
Nakita ni Dr. Thelma Sangrir nga may lima ka baradong ugat sa kasingkasing ni Celso. Nianang pagka ugma gi-operahan dayon siya. Gipaagi siya sa proseso nga gitawag og ‘Angiogram’ ug ‘Angioplasty.’
Sa ikatulo nga adlaw nahigmata si Celso nga gaan na ang iyang pamati sa lawas. Mipahiyom siya kang Nova nga nag-apong kaniya diha sa kilid sa katre. Midagayday ang luha sa kalipay sa mga aping ni Nova. Gigakos ni Celso si Nova. “May kapuslanan pa diay ko!” ni Celso sa laghaw nga tingog. (Katapusan)