BISAN wala ug tuo ang trabaho ni Coco Martin sa FPJ’s Ang Probinsyano isip direktor (ug unsa pa nang uban niyang trabaho), nakahigayon pa kini paglupad ngadto sa Dubai aron magsyuting sa pelikula nila ni Angelica Panganiban nga i-apil nila sa Metro Manila Summer Film Festival karong Abril.
Gigama ubos sa Star Cinema ug sa direksyon ni Mae Cruz-Alviar, ang Love or Money maoy unang panagpares sa duha.
Nakadayeg ko sa gitubag ni Coco kon wa ba kini mahadlok nga matakdan sa corona virus (nag mask siya dihang naglibot kini sa airport sa Dubai), nisulti kini nga ‘cautious but not scared because God is looking out for us.’
Mabuhi ka, Probinsyano!
•••
Manghugas gyud ta pirme sa atong mga kamot mao kini ang gibalikbalik pagsulti sa mga awtoridad sa panglawas aron makalikay sa corona virus.
Matod sa uban nga di mabuhi sa init ang virus hinaot pa unat nga makatabang sa pagpuo sa virus ang ting-init.
Ang mga relihiyuso nisulti nga kining gikahadlokan sa kalibutan karon usa ka pagsukod sa atong pagtuo sa Labawng Makagagahum mao nga gawas sa pagpanglimpyo, ato pang hugtan ang atong pagtuo.
•••
Nakaistorya namo si Baby S. King dihang gilunsad ang JFK Essentials (perfume, lotion, shower gel, cosmetics ug uban pa) didto sa Oakridge Business Park adtong Miyerkules.
Dinhi sa Cebu natawo si Baby apan tua na nanimuyo sa Pangasinan.
Ang JFK initials sa iyang bana nga maoy numero unong kritiko sa ilang produkto.
Maghisgot pa ko sa JFK Essentials sunod higayon. Atangi.
•••
Sukad sa iyang unang video ngadto sa pag-guest niya sa Gandang Gabi Vice ug hangtud nahimong co-host sa Mini Ms. U sa It’s Showtime, malingaw gyud ko aning Yorme (Aaron Sunga).
Utokan, abtik, mapahiyumon.
Niadtong Martes, dihang gisultihan ni Vice Ganda si Yorme nga timbayahon ang madlang pipol, nireklamo intawn ang bata nga wala may tawo nga nanan-aw (tungod kay wa nay live audience parehas sa ubang programa sa ubang istasyon).
Mao nga giklaro ni Vice nga timbayahon ang nanan-aw sa ilang mga telebisyon ug nisunod intawn si Yorme.
Samtang kasagaran nato mangandoy nga modako og dali ang usa ka bata, ako nangandoy nga dugay pa modako si Yorme tungod kay malingaw gyud ko niya labaw pa sa ubang bata sa ABS-CBN.