KAHATAGAN na og kasulbaran ang kakuwang sa supply sa tubig sa dakbayan sa Lapu-Lapu, karong buwana gikatakdang ipahigayon ang groundbreaking ceremony sa katukoran sa duha ka mga desalination plant.
Nalangay ang maong proyekto sa CitiCore Summa (CS) Water Corp. diin niadto pa untang Disyembre 2019 ang groundbreaking, resulta sa nahitabong kagubot sa kanhi sakop sa board of directors (BOD) sa Metro Cebu Water District (MCWD) tali sa pamunoan ni Cebu City Mayor Edgardo Labella.
“So, naglisod ang CitiCore kon si kinsa ang ilang transactionan (diha sa MCWD sa dihang gidumala pa sa kanhi sakop sa BOD),” matod pa ni Lapu-Lapu City Mayor Junard Chan sa interview sa SunStar Cebu.
Ang Citicore Summa Water usa ka Luzon-based joint venture company nga nalambigit sa paghatag bulk water supply ingon man concessionaire agreements, nga mobutang og duha ka desalination plants aron nga makatunol og 60,000 cubic meters nga supply sa tubig matag adlaw sa dakbayan sa Lapu-Lapu, human sa pakig-alayon ngadto ni Chan niadtong Oktubre 2019.
Apan sa bag-ong han-ay sa BOD nga opisyal nang gitudlo ni Cebu City Mayor Labella, ilabi na nga niadtong Marso 6 gi-aprobahan ang resolusyon diin ang MCWD mo-bid out sa desalination seawater projects alang sa mga local government units nga naproblema sa supply sa tubig lakip na ang isla sa Mactan.
Sa maong paagi, malahos na ang pagbutang sa maong desalination plants sa Lapu-Lapu nga mahimutang unya sa Barangay Punta Engaño ug lain sa barangay Marigondon.
Mihangyo si Chan ngadto sa MCWD sa pag-upgrade sa ilang mga tubo nga nagkutay sa mainland Lapu-Lapu.
“Some are old already. Dunay existing pipeline nga wa gyuy tubig mao nay giproblemahan sa MCWD,” saysay sa opisyal.
Una nang mipadayag ang mayor sa kakuwang sa supply sa tubig ilabi na sa barangays Punta Engaño, Mactan ug 11 ka barangay sa isla sa Olango.
Moabot ngadto sa 90,000 cubic meter sa matag adlaw ang kakuwang sa supply sa tubig alang sa Opon.
Sa higayon nga matukod ang nahisgutang desalination plant dili gihapon pa-igo sa kinatibuk-ang panginahanglan sa Lapu-Lapu.
“We welcome some investors who are interested. We will not limit to one company or supplier,” pamahayag pa ni Chan.
Apan gisalikway sa mayor ang na-unang pamahayag sa kanhi chairman sa MCWD board nga si Joel Mari Yu diin gibasol ang “massive waterproofing” sa Sugbo pinaagi sa pusot-pusot nga katukoran sa mga subdivisions, edipisyo, industrial parks ug uban pa, hinungdan nga dili makapundo og tubig ang groundwater aquifer o reserve nga maoy source sa MCWD.
Gipasabot sa mayor nga ang Lapu-Lapu nga usa ka isla wa magsalig sa kawot o drilling, apan nagsalig sa desalination ingon man sa supply sa tubig nga gikan sa lungsod sa Carmen nga maghatagan og 300,000 cubic meter per day.
“Lisud man pud kaayo nga dili nato i-welcome ang development for our city which is maoy atong gisaligan, mokita man gyud ta ana,” sigun pa ni Chan. (FVQ)