MALAMPUSONG nasikop sa hot pursuit operation sa Pardo Police Station 7 ang usa sa duha ka mga suspek nga nitulis-patay sa grade 11 student sa Sityo Mahayahay, Barangay Pardo, siyudad sa Sugbo niadtong Martes sa gabii, Marso 10.
Sulod lang sa 24 oras, ang usa sa mga suspek positibo nga gitudlo sa saksi sa panghitabo nga niluba sa biktima.
Si PMaj. John Kareen Escober, hepe sa Pardo Police Station 7, miila sa ilang dinakpan nga si Patricio Lapinid, 24,ug residente sa Sityo Mahayahay 1 sa samang barangay.
Samtang ang kauban nga suspek nga uban niadtong tungora ni Lapinid maoy gimonitor karon sa Pardo Police Station kon asa na kini nagtagotago.
Ang dinakpan sa pagkuha sa iyang habig wala kaayo mohatag sa detalye apan iyang gikakurat nganong siya ang gidakop nga ang pasalig kaniya sa pulis nga igo lang kini nga dalhon sa estasyon ug dunay mga pangutana apan ang sunod nga hitabo posas na ang iyang naangkon.
Si Escober niingon nga katungod ni Lapinid ang pag depensa sa kaugalingon apan lig-on ang ilang gihawiran nga saksi nga positibong miila kaniya sa paghimo sa krimen
“Adto nana niya tubagon sa korte ang iyang depensa,” dugang ni Escober.
Ang apohang babaye sa namatay nga si James Danyel nga si Nelita Espinosa, inahan sa amahan sa namatay, niingon nga sa wala pa ang insidente makasul-ob og sinina nga sama sa grupong Men in Black.
Nianang buntag sa wala pa namatay si Danyel nga maoy tawag sa pangalan, nisaad kini nga manarbaho una samtang wala pay summer class.
Wala pay tukma nga adlaw sa paglubong sa patay nga lawas si Danyel sanglit nga ang amahan mouli pa gikan sa Dubai ug ang inahan niini mouli usab gikan sa Germany.
Ang iyang ginikanan buwag na ug gikatakdang mag-abot sa haya sa anak. (BBT)