SUPERBALITA CEBU

Ferro: Toledo naa sa drug matrix

HEPE sa Police Regional Office 7 Police Brigadier General Albert Ignatius Ferro nikompirmar nga naa sa drug matrix si Maria Liza Toledo, ang konsehal sa lungsod sa Ginatilan, Probinsya sa Sugbo.

Si Toledo gipusil patay sa wa pa mailhing mamumuno gawas sa munisipyo human nitambong sa session.

Dunay mga estorya nga usa ka sniper ang nipusil patay kang Toledo, apan wa pa kini makompirmar sa kapulisan.

Gipasabot ni Ferro nga ang pagkalambigit ni Toledo sa drugas tungod sa iyang uyab nga si Norbert Antiquando, kinsa nabilanggo sa New Bilibid Prison niadtong 2001.

Sa mga nalambigit sa illegal drugs atol sa paglingkod ni Presidente Rodrigo Duterte, nabutang matod pa, si Toledo sa number 1 nga listahan nga iya pang ipasusi kon unsa ka tinuod ang nadawat nga kasayuran.

“I think she was listed because maybe of her association with her boyfriend. I think she was number one in the list,” matod ni Ferro.

Laing mga motibo

Sa iyang kamatayon, wala nila isalikway ni Ferro ang ubang mga posibilidad sama sa pulitika ug negosyo nga maoy gimando ni Ferro nga angay palawman ang imbestigasyon.

Negosyante, matod pa, si Toledo og bugas sa sulod sa Abuyog Penal Colony sa Lalawigan sa Leyte.

Usa sa ilang subayon kinsa ang nakabangga niini nga negosyante usab sa maong dapit.

Siya matod pa ang nag-supply sa bugas sa usa sa labing dako nga penal colony sa nasud, apan giinitan kini sa pipila ka mga negosyante usab og bugas.

Nabilanggo usab kaniadto sa penal farm si Antiquando.

Lakip sa iyang ipasusi ang politika tungod kay adunay naabot nga impormasyon nga ni pasaka kinig kaso sa iyang kabanay nga midagan sa taas nga posisyon sa ilang lungsod.

“We are still looking into politics. Alam mo dyan sa ilahang lugar, naay heated rivalry with other political groups. So we are not discounting politics,” dugang ni Ferro.

Tungod niini, makig-alayon ang PRO 7 sa National Capital Region Police Office aron mokuhag impormasyon ni Atiquando nga nabilanggo sa NBP.

Si Police Colonel Roderick Mariano, hepe sa Cebu Provincial Police Office, sa iyang bahin, nibutyag nga sa pagkakaron nagpadayon pa ang iyang mga sakop sa Ginatilan sa ilang imbestigasyon.

Iyang gimandoan ang hepe sa Ginatilan nga si Police Lieutenant Lito Tadique nga ipaubos sa imbestigasyon ang bata-bata ni Toledo nga si Yuri Singco nga maoy nakita sa close circuit television (CCTV) camera nga maoy kuyog niini nga nagbaktas gawas sa munisipyo.

Si Yuri usab kadtong lalake nga makita sa hulagway nga migakos sa biktima nga nagkadugo na nga wa nay panimuot.

“Mayron syang kasama na si certain Yuru Singco. So, we’re still conducting investigation sa kanya,” matod ni Mariano.

Gipasusi na usab ang mga CCTV camera nga gimontar duol sa munisipyo sa lungsod aron makita unsay gisakyan sa mga suspek.

Sa unang CCTV video nga nakuha sa mga pulis, ang makita lang mao ang biktima nga kalit nga nahagba human pusila samtang ang mga suspek wa makuha sa camera.

Sigun sa doktor nga mihiling sa lawas ni Toledo, aduna kini, usa ka samad pinusilan sa likod ug milapos kini sa iyang dughan.

Gituohan nga ang gunman naa ra sa layo.

Wa moklaro si Mariano kon posible bang usa ka sniper ang nipusil kang Toledo.

Sugdan na usab sa CPPO ang special investigation task group nga maoy motutok sa kamatayon sa konsehala. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!