GIPAUBOS ni Presidente Rodrigo Duterte ang tibuok Metro Manila sa “community quarantine” sulod sa 30 ka adlaw human giaprobahan niini ang rekomendasyon nga i-isa ang alert level sa coronavirus disease (Covid-19) ngadto sa Code Reb sub-level 2.
Matod ni Duterte magsugod ang community quarantine o lockdown sugod 12:01 a.m. sa Marso 15, Dominggo. Gipahibalo kini sa Presidente kagabii, Huwebes, Marso 12.
Sa gipagawas nga resolusyon sa Inter-Agency Task Force for Management of Emerging Infectious Disease, suspendido sab sulod sa 30 ka adlaw ang tanang land, domestic air, ug domestic sea travel padulong ug gikan sa Metro Manila.
Apan padayon nga mag-operate ang Metro Rail Transit, Light Rail Transit, ug Philippine National Railways sa kaulohan basta ipatuman lang ang social distancing.
Base sa datus sa 2015, ang Metro Manila o National Capital Region adunay populasyon nga 12.87 milyones.
Gikalangkuban ang Metro Manila sa mga dakbayan sa Manila, Quezon, Caloocan, Las Piñas, Makati, Malabon, Mandaluyong, Marikina, Muntinlupa, Navotas, Parañaque, Pasay, Pasig, San Juan, Taguig, Valenzuela, ug lungsod sa Pateros.
Base sab sa guidelines sa task force, mamahimo usab nga magpahigayon og community quarantine ang mga lokal nga kagamhanan nga anaa gawas sa Metro Manila.
Sa latest nga datus gikan sa Department of Health (DOH), 52 na ang nagpositibo sa Covid-19 sa tibuok nasud, 49 niini natala sulod sa unom ka adlaw.
Sa tanang nagpositibo, duha na ka mga pasyente ang nangamatay. Mao kini ang 44 anyos nga Chinese tourist nga gidala sa San Lazaro Hospital ug 67 anyos nga babayeng Filipino sa Makati Medical Center.
Gibutyag ni DOH Secretary Francisco Duque III nga kuwang ang pondo sa public health sector aron batukan ang Covid-19.
Matod sa DOH, nanginahanglan sila og di momenus sa P3.1 bilyones sa sunod nga 90 ka adlaw alang sa pagpalit sa mga personal protective equipment ug diagnostic test kits ug bayad sa mga dugang kawani alang sa Bureau of Quarantine.
Gikanselar, giuswag
Gi-postpone ni Mandaue City Mayor Jonas Cortes ang tanang mga kalihokan nga adunay kalabotan sa pista sa Dakbayan sa Mandaue City aron sa paglikay sa COVID-19.
Di lang usa ipadayon ni Cortes ang mga kalihukan sama sa Panagtagbo Festival and Showdown, Miss Mandaue, Mandaue’s Got Talent, Sangguniang Kabataan (SK) Night, Mayor’s Cup ug uban pa.
Dugang sab niya nga ang ubang mga pribado nga eskwelahan sa dakbayan kutob nalang karong semanaha samtang ang mga publikong mga eskwelahan mag final exams na sunod semana.
Sigon ni Cortes nga papaulion na og sayo ang kabatan-onan labi na sa mga mag-standby sa Mandaue City Plaza.
Iyang gi-abisohan si Police Col. Jonathan Abella, city director sa Mandaue CIty Police Office, nga mag roving ug abisohan nga papaulion na.
Samtang, di magduha-duha si Lapu-Lapu City Mayor Junard “Ahong” Chan nga ikanselar ang mga kalihukan sa Kadaugan sa Mactan ug 1-Year countdown alang sa Quincentennial celebration sa dakbayan sa Abril 27.
Matod ni Chan nga iyang ipahibawo ang naasoyng hisgotanan ngadto sa National Historical Commission (NHC) kon sila magtagbo alang sa pag-finalize sa mga kalihukan.
Nasayran nga ang NHC lakip sa paghan-ay sa mga kalihukan sanglit ang Kadaugan sa Mactan karong tuiga kay mao man usab ang one-year countdown sa Quincentennial celebration sa 2021.
Gawas sa Kadaugan sa Mactan sa Abril 27 ubay-ubay usab ang mga kalihukan ang giandam alang sa among selebrasyon usa ka semana sa dili pa ang aktwal nga kalihukan.
Kini sama sa Food Festival unya sa Mactan Shrine, Patik de Mactan ug uban pa.
Dakpon
Hepe sa Police Regional Office 7 mopaimbestigar sa mga negusyante nga nagtago sa mga facemask ug alcohol human masuta nga nangahurot na ang stocks sa dagkong mga tindahan sa siyudad sa Sugbo.
Nabantayan sa kapulisan nga nangahurot na ang supply sa facemask ug alcohol sa dagkong mga tindahan human kasagaran sa mga tawo nag panic buying na.
Matod ni Police Brigadier General Albert Ignatius Ferro, hepe sa PRO 7, nga mohimo silag imbestigasyon kon mahibaw-an nga adunay mga tindahan o negosyante nga mihurot sa pagpamalit sa mga facemask ug alcohol aron ipamaligyag mahal.
Makig-alayon sila sa mga ahensya sama sa Department of Trade and Industry (DIT) aron mabadlong ug mapasakaan og kaso kadtong mipahimulos sa higayon tungod sa kabalaka sa publiko nga matakdan sa corona virus disease 2019.
Samtang sa Cebu Provincial Police Office, nipatuman na usab si Colonel Roderick Mariano sa no mask, no entry sulod sa kampo.
Hinuon, matod niya nga aduna silay giandam nga libreng facemask alang sa mga personnel sa CPPO nga mahimong magamit sa iyang mga sakop.
Gawas sa facemask nga gipanghatag nga libre, aduna usab silay thermal scanner nga mosusi sa kainiton sa mga pulis.
CSBT
Aron masiguro nga luwas sa sakit o simtomas sa Covid-19 ang mga pasahero sa Cebu South Bus Terminal (CSBT), mo-gamit na og thermal guns ang terminal aron masuta ang temperatura sa mga pasahero nga mosulod.
Matod ni Carmen Quijano, pangu sa CSBT, nga gi-kinahanglan ang pag panagana sanglit may mga pasahero nga posible nga nagdala og kagaw ug motakod sa mga kauban nga mga pasahero. (TPM,NDT, AYB, GCM, ANV, KFD)