Rabacal: Ang gahum sa pag-ampo
ANG kaso sa coronavirus disease (Covid-19) miabut na og kapin sa 40 ug hayan mopadayon pa pagsaka. Sumala pa sa ubang mga tawo nga diutay ra ang nasayran nga nataptan niining maong sakit kay wa man kitay daghang ekipo alang sa pag-testing sa tanang mga tawo kon naghambin ba niining maong sakit. Daku kaayo ang Covid-19 og nahimong kadaut sa ekonomiya dili lamang sa Pilipinas, apan sa tibuok kalibutan. Mitibugsok ang stock market sa kalibutan. Daghang mga negusyo ang nangaalkanse nga ang uban nanira gayud. Minus na usab kaayo ang pasahero sa mga ayroplano. Mireklamo na ang mga taxi driver kay maglisud na sila sa abangan sa ilang gimanehong taxi. Ang mga hotel ug resort mingaw na kaayo. Miminus na usab ang mosuroy sa mga mall. Misamut ang kahadluk sa katawhan tungod niining mga sayop nga mga balita kalabut sa pagkuyanap niining maong kagaw. Ang pagtungha sa kabataan na-apektuhan na usab kay anaa nay mga klase sa Metro Manila ug sa ubang dapit nga gi-undang. Hapit tanang kalihukan sa eskuylahan gipangkanselar apil na ang mga sports event.
Adunay daghang mga balita kalabut sa mga prutas ug utanon nga epektibo kuno batok sa maong sakit. Gi-estudyohan na usab karon ang maayo kunong epekto niining virgin coconut oil batok sa maong virus. Hapit na usab kuno madiskubrihi ang bakuna alang niini. Apan kining tanan pulos mga pangagpas lamang og wala pa gayuy tino nga epekto batok sa Covid-19. Sa laktud nga pagkasulti wala pa gayuy nasayud kon hangtud kanus-a mabuntog ug matapos kining Covid-19. Ang labing maayong buhaton mao ang pag-ampo ngadto sa kahitas-an aron paagsumpo niining makalilisang nga sakit. Angayang mahibaw-an sa tanan, bisan unsa ang iyang relihiyon, nga gamhanan ang pag-ampo sa atong Dios!
•••
Tinuod ba kining reklamo sa mga taxi driver nga anaay mga colorum nga sakyanan nga anaa maghuwat og pasahero sa Senior Citizen’s park, luyo sa Cebu City hall? Adunay mga taxi driver nga mireklamo kanako nga dili sila mahimong mopasakay og pasahero sa maong dapit kay abugon sila sa mga driver sa mga sakyanan nga mag-parking kay maghuwat og pasahero sa maong dapit. Sumala sa mga driver sa “colorum” nga daku sila og bayad sa pagpamasahero dinha. Tinuod ba nga pabayran ang maong dapit? Asa man punta ang kwarta?
Manghambug raba kuno kining maong mga driver nga lig-on kaayo ang ilang amo mao nang dili sila mahilabtan. Mao usab kana ang nahitabo sa dapit sa north reclamation area, sud sa Pier 1 ug sa atbang sa South Bus Terminal. Attention Land Transportation Office (LTO), Land Transportation Franchising and Regulatory Board (LTFRB) ug Cebu City Transportation Office (CCTO) kay kamo rabay kanunay ipasangil niining mga tawhana nga ila kunong mga amo. Kon dili kini masumpo makaduda kita. Nangreklamo kining mga taxi driver kay diutay nalang kaayo karon ang ilang mga pasahero tungod sa mga habal-habal nga maglisud na gani sila sa ilang abangan ngadto sa ilang mga operator. (mannyrabacal1144@ gmail.com)