GIDEKLARAR ni Presidente Rodrigo Duterte niadtong Lunes, Marso 9, ang usa ka national public health emergency tungod sa nianam pagsaka nga mga kaso sa COVID-19 sa Pilipinas.
Sa maong paagi, magamit ang resources sa tanang departamento sa gobyerno sa pagtubag sa emerhensya dala sa maong sakit nga mitakboy sa dul-an 50 na ka mga tawo sa atong nasod.
Ang corona virus nga hinungdan sa maong sakit unang nibutho didto sa Wuhan, China. Kapin na sa 100,000 ka mga tawo ang positibo niini, kadaghan didto sa China. Kapin na sa 3,000 ang nangamatay.
•••
Ang mga health experts niingon nga wa pay tambal ug bakuna batok sa maong sakit. Ang ilang tambag mao nga kanunay nga manghugas sa mga kamot ginamit ang sabon ug tubig aron malikayan ang pagkuyanap niini.
Angay usab maglikay sa mga dagkong pundok sa mga tawo. Apan wa kinahanglana ang panic buying kay moresulta lang kini sa pag-umento sa mga presyo.
Sa ubang mga nasod, nagpanic buying sila sa toilet paper. Sa usa ka hulagway nga klarong pasiaw, usa ka babaye nga nagdali-dali sa pagpalit og toilet paper nakalimot na hinuon sa pagpamante.
•••
Ang Malacanang nipasalig nga way angay nga kabalak-an ang publiko nga nga mahutdan sa supply kay dunay igong supply sa tanang mga nag-unang palaliton.
Apan ang unang gikuninitan sa mga customer mao ang mga face masks, alcohol, hand sanitizers ug sabon. Pero hangtod karon wa pay nitubag sa pangutana kon nganong 99.99 porsento ra sa nga kagaw ang mapatay sa alcohol.
Naglaraw ang kadagkoan sa organisasyon sa mga supermarket nga limitihan ang mapalit sa matag customer. Kadtong mopalit og binulto, adto na lang palit sa wholesaler.