DAGHAN ang gihimo karon nga pagpangandam ang kagamhanan aron kapugngan ang pagkatap ug pagkuyanap sa gikalisangan nga coronavirus disease (Covid 19). Sama sa Department of Education (DepEd) diin mikanselar na sa ilang kalihukan sama sa paugnat sa kusog. Gikanselar una ang mga regional meet ug posible nga ikanselar usab ang pagpahigayon sa Palarong Pambansa.
Gidebatihan pa karon kon isayo ba ang closing o pagsira sa klase sa public schools lukop nasud aron luwas ang mga bata ning balatian. Karon pang unang semana sa Abril mosira o mopahigayon og graduation ceremonies ang public schools. Daghan ang misugyot usab nga tapuson na lang gyud ang school year. Gi-discourage na ang mga tapok-tapok kay diha magsugod ang pagpanakod sa maong virus.
Gisuspenso una sa mga television networks sama sa GMA ug ABS-CBN ang pagdawat og mga audience o tumatan-aw sa ilang mga live shows sama sa Eat Bulaga, Wowowi, Showtime ug uban pa. Mismo ang National Basketball Association (NBA) sa Estados Unidos nagplano nga dili na modawat og live audience sa ilang mga duwa. Ambot lang kaha ang Philippine Basketball Association (PBA) nagplano ba usab niini?
Apan unsa man ang gihimo sa simbahan ning maong isyo? Adunay mga sugyot karon nga hunungon una ang mga kalihukan sa simbahan sama sa pagpahigayon og misa kay magtapok man ang daghang mga tawo. Dili lang igo nga wala nay hawiray sa kamot inig kanta sa “Amahan Namo” ug ang mga tawo na ang mokuha sa ostiyas gikan sa pari ug sila na ang mohungit niini sa ilang baba.
Sa Roma ug Italy diin paspas kaayo ang pagsaka sa kaso sa Covid 19, mimando na ang kadagkuan sa Simbahang Katoliko nga hunungon una ang misa ug ubang mga kalihukan sa simbahan nga magtapok ang mga tawo. Gani ang Santo Papa anha na sa dako nga screen makita nga magmisa. Nganong dili man usab kini himuon dinhi sa ato? Nabalaka sila nga kon wala nay misa, wala na say income ang simbahan? Asa man ipaagi ang amot? Aw, i-Pera Padala na lang sab. (bobbygnalzaro@gmail.com)