ANG Police Regional Office (PRO) mikompirmar nga si Ginatilan town Councilor Maria Liza Toledo naa sa drug matrix. Gilambigit siya tungod sa iyang kanhi kapuyo nga giingong drug lord nga nagbase sa New Bilibid Prison (NBP) nga si Norberto Antiquando.
Si Antiquando napriso sa kasong murder sa pagpatay sa usa ka Japanese national sa Barangay Banilad, Dakbayan sa Sugbo niadtong 2001.
Nadungog na nga toa sa NBP ang mga transaction sa illegal drugs sa tibuok nasod. Dinhi sa Sugbo, ang dungan nga mga greyhound sa mga bilanggoan nga gipangulohan sa Police Regional Office (PRO) 7 gitumong sa pagdiskobre sa drug transactions, sagad nagagikan sa Cebu City Jail.
Nasuta sa imbestigasyon sa Cebu City Police Office (CCPO) nga halos tanang drug transactions nagagikan sa jail, nga naglambigit sa kapin sa 100 ka mga piniriso sa illegal drugs.
Kining drug transactions gikan sa jails maputol lang kon mawagtang ang graft and corruption sulod sa Bureau of Jail Management and Penology (BJMP). Tan-awa lang gud, dunay mga hiwi nga jail officers nga mismo maoy namaligya og cellphones ngadto sa mga binilanggo.
Labing barato mapalit sa tag P3,000 samtang ang labing mahal moabot og tag P50,000. Duna nay mga jail officer nga giimbestigar karon sa kapulisan ug BJMP mismo.
Gikinahanglan nga dunay silot nga ipahamtang ang kagamhanan sa hiwi nga jail officers. Di lang kay ibalhin, kon di tangtangon gyud sa katungdanan. Kay kon kini ra ang buhaton, ingon sa gibalik lang ang problema. Malimtan ra kini paglabay sa mubo nga panahon, mahibalik ra sa naandan nga pwesto.
Kay tungod man sa graft and corruption nga nakalusot ang mga kontrabando, ang solusyon mao ang paglimpyo sa mao nga buhatan. Mao ra ni ang bugtong paagi nga mahunong ang drug transactions.