DAVAO DEL SUR – Daw nakasinati na og Semana Santa ang probinsiya human namenos ang mga tawong magsuroy-suroy sa mga pampublikong lugar sukad niadtong Lunes, March 9.
Human nabaniog nga nakasud na sa nasud ang gikahadlokang Coronavirus Diseas (COVID-19) nakahatag kini og epekto ilabi na sa daghang negusyo.
Namingaw sab ang ubang fast-food chain sa siyudad sa Digos diin sagad mapuno na sa mga tawo panahon sa pamahaw.
Apil nga nakasinati og kamingaw ang pipila ka mga malls nga maoy nag-unang kasuruyan sa katawhan.
Wa sab magsul-ob og face mask ang ubang staff ug mga security guard sama ni Jerry Planas sanglit wa nay mapalit nga suplay sa botika.
Alang niya, adunay mga namaligya gamit ang social media apan daw gipahimuslan sab ang presyo tungod sa kamahal.
Sa lungsod sa Bansalan, gibutyag ni Kevin Pantallano, branch manager sa bag-ong niabri nga fastfood chain nga namatikdan ang pagkunhod sa ilang kustomer.
Gikan alas 7 ngadto alas 10 sa buntag nga mao ang breakfast time anaa pa lamang sa 40 ka transaksiyon ang ilang nahimo kagahapon kon itandi sa miaging semana nga moabot na sa 70-80 ang ilang mahimo sa wa pa nabaniog ang Covid-19 outbreak.
Nahitabo ang pagsugod kamingaw sa mga nag-unang establisemento human gideklara ni Presidente Rodrigo Duterte ang "public health emergency" mao nga daghan sab ang mituman niini.
Sanglit wa nay mapalit nga mga surgical mask, daghan ang migamit sa mga panapton nga face mask diin adunay mga kataw-anang design sama sa nahiwi nga baba, niguwa ang dila ug mga baba ug uban pang desinyo tungod kay daghan ang baligya niini sa merkado.
Luyo niini, padayong nag-abiso ang mga awtoridad sa panglawas nga seguruhong limpyo ang mga kamot una mokaon ug molikay sa mga tawong adunay ubo. (Orlando B. Dinoy)