UPAT ang nakalas sa panagbangga sa van-for-hire ug Ceres bus sa national highway sa Barangay Estaca, lungsod sa Compostela, Sugbo, pasado alas 3:00 sa kaadlawon sa Biyernes, Marso 13.
Lima usab ang naangol nga gidala sa Danao City Provincial Hospital apan gibalhin sa ospital sa dakbayan sa Sugbo.
Gikan sa lungsod sa Daanbantayan ang v-hire nga gimaneho ni Patrick Tolo, 20, nga taga Barangay Tapilon, Daanbantayan, nga naa pa karon sa talandugon nga kahimtang.
Ang Ceres bus gikan sa North Bus Terminal sa dakbayan sa Mandaue nga gimaneho ni Jerry Lubon, 32, taga Barangay Libertad, dakbayan sa Bogo.
Ang mga nangaangol nga naa sa tambalanan sa Danao mao silang Mark Lester Briones, 35, taga Tapilon, Daanbantayan; William Lanzadares, 37, taga dakbayan sa Lapu-Lapu apan lumad nga taga Loon, Bohol; lakip sa mga drayber sa v-hire ug Ceres bus.
Sa pagkutlo ning maong balita wala pa hingpit makakuha sa mga pulis sa Compostela ang mga pangalan sa upat nga nakalas.
Samtang, dili na mahitsura ang dagway sa v-hire tungod kay nawalis na ang atop lakip na ang siding sa walang bahin niini apan wala ra maunsa ang Ceres bus.
Matod ni Lubon nga nahinabi sa sibyaanang dyHP RMN Cebu nga ni-overtake ang v-hire mao nga naigo kini sa iyang gimanehong bus.
“Hinay ra man akong dagan, Sir, mga 40 to 50 kilometer per hour ra kay gamay ra man akong karga. Ni-counter flow nang V-Hire nya kusog kaayo mao to nga wala nako makalikay,” matod ni Lubon.
Si Lord Ian Ygot nga taga Dayhagon Medellin Cebu nga sakay sa v-hire nagkanayon nga natulog siya samtang nagdagan ang van apan kalit lang nga nabangga.
Iyang gibutyag nga sa wala pa siya matulog kusog na ilang dagan gikan sa lungsod sa Daanbantayan.
Si Patrolman Jessie Vasquez, imbestigador sa Compostela Police Station, nagkanayon sa DyHP ug sa Superbalita Cebu nga kusog gyud ang dagan sa van sigun sa pamahayag sa mga sakay niini.
“Sigun atong sakay sa van kusog ilang dagan nya nasulod sila sa pikas lane mao tong na-impact sila sa Ceres, nya pag adto namo sa crime scene tulo to ka lalake ang patay na nya ang usa ka babaye diri na sa hospital namatay,” matod ni Police Patrolman Jessie Vasquez.
Gitanggong sa Compostela Police Station ang drayber sa Ceres bus samtang nagpadayon pa siya sa imbestigasyon ang kapulisan kung kinsa ang sad-an sa aksidente sa kadalanan ug pasakaan og tukmang kaso.