DUHA ang patay sa dakbayan sa Talisay sa managlahing insedente, kagahapong adlawa, Marso 13.
Napatay sa mga operatiba atol sa buy bust operation ang usa ka drug personality nga gi-ila nga high value individual.
Ang maong pagpang-ronda gipangulohan ni PLtCol.Marlu Conag ang pangulo sa Provincial Intelligence Unit (PIU) sa Cebu Provincial Police Office (CPPO) sa Sityo Caniba, Barangay Cansojong sa maong dakbayan.
Giila ni Conag ang namatay nga si Romulo Masbate Jr. alyas Migo, lomolopyo sa Barangay Maghaway, Talisay.
Matod pa ni Conag nga si Masbate nga taod taod na nilang gipangita si Masbate.
Sa dihang nakadawat og tip ang kapulisan sa presensiya ni Masbate sa area gihimo gilayon ang pagronda apan giingong nakig-pinusilay ang subject sa mga pulis, ug napatay.
Nahipos sa Scene of Crime Operatives ang usa ka medium size nga shabu nga mokantidad sa P170,000
Lakip usab nga narekober ang jsa ka 357 nga armas dunay lima ka buhing bala ug usa ka kabhang nga bala sa crime scene.
Sa laing bahin, lawas napalgan nga gidudahang biktima sa salvage.
Si PMsgt.Reynaldo Tanica, Talisay City Police Station nga nahinabi sa Superbalita Cebu miila sa biktima nga si Jan Jan Borromeo, taga-Barangay Candulawan, dakbayan sa Talisay.
Matud ni Tanica nga napalgan nalang ang lawas nga nag buy-od sa sudlonon nga bahin sa Sityo Salvador, Barangay Tangke nga gituohang biktima sa salvage, diin giputos sa sako ang ulo sa biktima.
“Wala may naka-ila sa mga taga didto kay dili man daw to taga-Barangay Tangke kining biktima,” asoy ni Tanica.
Nasuta nga ang maong lalake gikatahong gireklamo sa barangay Tangke human sa giingong nanghikap og pribadong bahin sa usa ka babaye nga biktima niini sa mga milabayng adlaw. (BBT)