GIPAHIBALO kagahapon, Marso 13, sa mga opisyal sa mga dakbayan sa Sugbo, Mandaue, Lapu-Lapu ug sa lalawigan sa Sugbo bahin sa pagsuspenso sa klase sa tanang ang-ang sa mga publiko ug pribadong tunghaan tungod sa risgo sa Covid-19.
Sa probinsya sa Sugbo gideklarar ni Cebu Provincial Governor Gwendolyn Garcia nga sugod sa Lunes, Marso 16, nga suspendido na ang mga klase sa kindergarten ngadto sa high school sa pribado og pampublikong tunghaan sa lalawigan
Wala niya gisuspenso ang klase sa tertiary tungod sa lahilahi niini nga academic calendar.
Sa Cebu City, si Mayor Edgardo Labella niingon iisuspenso ang klase sa tanang level sa pribado ug publikong tunghaan sulod duha ka semana sugod Marso 16 hangtod sa Marso 28, 2020.
Sama sab sa Lapu-Lapu, ang pagsuspenso a klase sulod sa duha ka semana sugod Marso 14.
“Until further notice, kay basin ma-extend (suspension) kon unsay mahitabo sa umaabot,” pasabot ni Chan.
Sa Mandaue, gisuspenso na ni Mayor Jonas Cortes ang mga klase lakip sab ang school activities sama sa graduation rites ug moving up ceremony sugod sa Marso 13 ug wala pa pud kini moingon kung hangtod kanus-a ang suspensiyon.
Samtang si Mayor Gerald Anthony Gullas, miingon nga sa Talisay ipahigayon ang final exam sa mga tunghaan karong Lunes, Marso 16, human niini wala nay klase nga ipahigayon apan, ang suspensiyon limitado lang sa publikong mga tunghaan. (ANV, JJL, FVQ, KFD, JCT)