DAGHAN ang wa makontento sa pamahayag ni Presidente Rodrigo Roa Duterte sa miaging Huwebes dihang iyang gianunsyo ang planong lockdown sa Metro Manila. Ako mismo naglibog nganong dili si Health Secretary Francisco Duque III ug ubang expert ang gipabatbat sa mga detalye
Dayon, pulos mga planong pang-militar ug pangpolis ang gihisgotan. Iya pang gidayeg ang China nga iyang pangayu-an og tabang.
Nakasabot ba ang mga katawhan? Ang media mismo naglibog nganong “lockdown” ang gihisgotan sa Presidente dayon pagka ugma iyang spokeman mismo nga si Atty. Salvador Panelo nanaway sa paggamit niining maong termino.
Matod pa sa presidential spokesperson, ang saktong termino mao ang community quarantine.
Imbes kita mismong naminaw si Presidente Duterte ma-inspired ug mahiusa batok sa coronavirus disease kun COVID 19, grabing kalibog ang atong nasinati-an.
Bisan pa man sa kahanggaw sa maong diskurso (murag nagtama), angayang mosuporta kita sa atong lider batok niining COVID 19.
Ngano? Kay kining COVID 19 walay gipili ma-politika man, rasa, social class, edad. Bisan kinsa mahimong matakdan.
Taym sa, mas seryuso diay kon ang natakdan dunay pre-existing disease, tiguwang na, o kadtong unos ang immune system. Kini sila ang peligrong mamatay.
Mangutana lang ko, pila kabuok sa nagbasa nako karon ang dunay high blood, diabetes, sakit sa baga, ug kapin na sa 50 anyos?
Mao nga mahinungdanon nga maghiusa kitang tanan. Sundon nato ang mga lagda sa kagamhanan. Dayon kon sa atong tan-aw dunay kulang, buhaton na lang nato ug dili na mangitag bikil.
Pananglitan, wala maghisgot si Digong kabahin sa kahimtang sa mga kabus kon dunay community quarantine.
Kaya ba sa kagamhanan ang pagpakaon bisan usa ka urban poor community sa kaulohan gikan sa Marso 15 ngadto sa Abril 14, 2020?
Kon dili sila makatrabaho, di sila makapalit og mga gikinahanglang palitunon labi na ang pagkaon. Kaya ba sa kagamhanan nga mopakaon kanila sulod sa usa ka bulan?
Usa ka mayor dinhi sa Sugbo ang naproblema kay dili sila maka-deklarar og state of calamity kon walay mopositibo nga duha ka buok.
Daghan kaayo ang wala mahisguti sa Presidente. Apan kinahanglan natong buhaton.
Dayon, naa kining tanyag sa Russian ambassador nga tambal gikan sa Russia. Naglibog ko kay wala moabot ang maong balita ngadto sa Presidente. Ug dunay DDS nga niingong fake news kuno.
Alang kanako, mopadayon na lang kita sa pagbuhat sa angayang buhaton.
@anol_cebu sa Twitter