SAGAD kon kinahanglanon gani, magpalaban ta sa usa ka tawo. Mosumbong ang bata sa iyang ginikanan o maguwang kon awayon siya. Magpalaban sad ta sa mga tinugyanan sa balaod kon may gihimo nga salaod batok kanato. Dili sa tanang panahon magpalaban ta sa laing tawo. May gitawag nga “security blanket”. May dili mahimutang kon molakaw sila nga walay gibitbit nga dakong bag o libro. Mobati sila og seguridad kon dala nila kini.
Usa ka banga kun tadyaw ang sudlanan og tubig sa babayeng Samaryanhon. Mao kini iyang panghakot (?) sa tubig inig-adto niya sa atabay ni Jacob matag udtong tutok. Apan dili lamang sudlanan kini sa tubig kondili pangtabon usab sa iyang nawong aron dili niya makita ang mga hait nga tinutokan sa iyang mga silingan. Unsaon ta man god kay wa may klaro iyang kinabuhi. Lima na ka lalake ang iyang nakapuyo. Nagpalaban diay ang babaye sa iyang tadyaw nga panagang sa saway sa uban.
Nagpalaban si Moises sa Ginoo sa dihang nagbagulbol ang mga Israelita batok kaniya: “Nganong gipabiya man mi nimo sa Ehipto? Aron lang ba nga mamatay kami dinhi tungod sa kauhaw uban sa among mga anak ug kahayopan?” Gipang-uhaw man god sila sa lugar nga awaaw. Gipahapak sa Dios kang Moises ang bato ug miawas ang tubag gikan niini. Ang mosalig sa Ginoo dili gayod mapakyas.
Nagpalaban usab si Pablo sa iyang pagkahinimong matarong pinaagi sa pagtuo diha ni Jesucristo. Kining pagtuo ubanan sa paglaom nga “dili makasagmuyo kay ang gugma sa Dios gibubo sa atong mga kasingkasing pinaagi sa Espiritu Santo nga gihatag kanato”. Gipamatud-an ang maong gugma sa kamatuoran nga “samtang makasasala pa kita nagpakamatay si Jesus alang kanato”. Wa nay laing lig-on pa kondili magpalaban sa gugma sa Dios.
Kinahanglan kita magpalaban sa Dios atubangan sa dakong hulga sa Covid-19. Dili ni tiawtiaw nga hagit. Magsugod kita diha sa pagpakigharong sa mga kahadlok nga atong ginabati. Ilahi nato ang kahadlok nga gikan sa fake news ug gikan sa masaligan nga balita. Ibalibag nato ang fake news. Atubangon nato ang kamatuoran mahitungod sa COVID-19 ug hinumdoman nato nga “panic does not pay”.
Sa laing bahin, maminaw sad kita sa mga pahimangno sa mga awtoridad. Gihatagan kita sa Ginuo og panghunahuna nga gamiton alang sa atong kaayohan. May mga batid sa medisina ug syensiya. Paminawon nato sila. Manghugas ta kanunay. Likayan nato ang daghang mga tawo. Wa lang usa tay ginunitay. Dili lang usa ta mohalok ug hikap sa mga larawan sa simbahan. Ug uban pa.
Atubangan sa krisis sa Covid-19, nagpalaban na ba kita sa Dios samtang migamit kita sa atong pangisip?