ANG curfew estriktong ipatuman sa Siyudad sa Sugbo isip usa sa mga lakang sa City Government taliwa sa pagkatap sa coronavirus disease (Covid-19) sa ubang mga dapit sa nasod sugod sa Sabado, Marso 14, 2020.
Mao kini ang gipahibawo ni Mayor Edgardo Labella ug niepekto dayon. Sa Facebook post sa City Public Information Office (PIO), ang City Ordinance 1786 kun Curfew Ordinance sa Siyudad estriktong ipatuman.
Gidid-an sa ordinansa nga maglaroylaroy gawas sa balay ang mga menor de edad gikan sa alas 10 sa gabii hangtod sa alas 4 sa kaadlawon pagkasunod adlaw.
Si PIO head Razel Cuizon niingon nga ang mando gipadala na ngadto kang Cebu City Police Office (CCPO) officer-in-charge Police Colonel Engelbert Soriano alang sa pagpatuman.
“This is a way so the children will not loiter around after we declared the suspension of classes,” siya nagkanayon.
Iya usab nga giawhag ang mga residente sa siyudad sa pagdala og identification (ID) cards aron masusi sa mga pulis ug barangay tanods.
MENOR
Si Soriano, sa iyang bahin, niingon nga sa paghagtok sa alas 10, wa nay menor nga makit-an sa karsada. Kadto lamang nag edad 17 anyos paubos ang ilang badlongon ug papaulion.
Gi klaro hinuon niya nga mahimong magpadayon ang mga legal na ang pangidaron sa ilang pag suroy-suroy ug kadtong adunay mga trabaho panahon sa kagabhion.
“May specific instruction naman si Mayor na i-enforce namin ang curfew for minors, not curfew for general curfew bah. So, starting at 10 o’clock tonight, mag intensify kami ng enforcement nito,” matod ni Soriano.
Iyang mando sa tanang police station commanders nga kinahanglan nga silang tanan nga mga pulis manggawas ug mo-roving sa karsada. Kon adunay makita nga menor de edad sa gawas, papaulion kini sa ilang tagsa-tagsa ka balay.
Nibahad si Soriano nga kon adunay magmagahi ug mosupak sa mando sa mayor, ila kining pugson sa pagkarga sa patrol cars ug ihatod sa ilang mga balay.
“Pauwiin. If they resist, isakay namin sa mobile, dalhin namin kung saan sila nakatira kasi walang DSWD facility eh,” dugang ni Soriano. Mahimo usab nga pangitaan nilag identification card ang usa ka tawo kon madudahan ang iyang pangidaron.
FLIGHTS GIDID-AN
Gidid-an na sa pagsulod dinhi sa Sugbo ang tanan nga mga flight gikan sa Cagayan De Oro City, Clark sa Pampanga, Dumaguete City ug Legaspi City sa Albay sulod sa 30 ka adlaw.
Kini maoy giluwatan nga kamandoan ni Gobernador Gwendolyn Garcia nga nalatid sa Executive Order (EO) 5-E sa Marso 14, 2020 subay sa padayon nga pagkatap sa Covid-19.
Ang kamandoan epektibo karong adlawa, Dominggo, Marso 15, 2020. Karong Lunes, Marso 16, di na sab makatugpa sa Mactan Cebu International Airport (MCIA) ang flights gikan sa Davao, Camiguin, Siargao, Palawan, Bacolod, Iloilo, Zamboanga, Caticlan ug Kalibo.
Wa na usay mga barko gikan sa Dakbayan sa Dumaguete nga makadunggo sa mga pantalan sa lalawigan sa Sugbo.
Sa Lunes, did-an na usab nga makadunggo ang mga barko gikan sa Dakbayan sa San Carlos, Guihulngan ug Escalante sa Negros Island.
Sa Martes, wa nay bisan usa nga barko gikan sa ubang mga dapit sa nasod nga makadunggo sa bisan asang mga pantalan sa lalawigan. Iya usab nga gimando ang pagpatuman sa curfew gikan sa alas 10 sa gabii hangtod sa alas 5 sa buntag. Nagplano usab si Garcia nga idili ang mga relihiyusong panagtapok.
MISA
Way gikanselar sa mga misa sa Cebu. Apan ang mga magtutuo mahimong makabalaan sa adlaw sa Ginuo pinaagi sa pag-ampo, pagbasa sa Bibliya sa ilang mga balay ug pagtan-aw pinaagi sa livestream o gi-broadcast nga misa sa telebisyon.
Kini sumala sa guidelines nga giluwatan sa Archdiocese of Cebu, Biyernes, Marso 13, 2020 human ang Catholic Bishop’s Conference of the Philippines (CBCP) niapelar sa kaparian ug mga magtutuo sa paghimog lakang nga di makakuyanap ang Covid.
“The statement of the CBCP circular on the Public Health Emergency Covid-19 reminds us of our moral and pastoral obligations to help contain this world pandemic,” matod sa Archdiocese of Cebu sa usa ka pamahayag.
Si Fr. Ric Anthony Reyes, sa Basilica Minore del Sto. Niño, niingon nga regular silang nag-livestreamed sa mga misa sa Basilica matag alas 12 sa udto ug alas 3 sa hapon sa Biyernes ug matag alas 11:30 sa buntag ug alas 2:30 sa hapon sa Dominggo.
Ang mga misa sa Dominggo nga streamed live sa Basilica makita sa SunStar’s Facebook accounts (@sunstarcebu, @superbalitacebu,@sunstarphilippines) and its website at www.sunstar.com.ph.
Si Fr. Fidel Orendain, SDB, rector sa Don Bosco Technical College, niingon nga ubos sa Canon Law, mga Katoliko obligadong moapil sa Eucharist matag Dominggo ug mga adlaw sa obligasyon.
“However, there is a provision there that one may be exempted or excused for serious reasons which would pertain to illness or if there are considerations that the pastor would understand,” siya niingon.
111 POSITIBO
Ang Department of Health (DOH) nipahibawo sa laing tulo ka mga kamatayon ug bag-ong 47 ka bag-ong mga kaso sa Covid-19 sa Sabado, Marso 14.
Kini nagdala sa mga kasong positibo ngadto sa 111.
Si DOH Assistant Secretary Maria Rosario Vergeire niingon nga ang mga team nagsusi pa sa mga detalye sa bag-ong mga kaso.
Iyang giseguro nga nagpadayon ang ilang contact tracing.
Gipahibawo usab sa DOH nga ang Patient 40, usa ka 54 anyos nga Pinoy nga lalake nga na-confine sa Northern Mindanao Medical Center (NMMC) sa Cagayan de Oro City, namatay sa sakit./ ANV, AYB, JJL, WBS, NJN