Lola milaban sa iro nga gibato, nanigbas

TINUOD nga man’s bestfriend ang iro kay dihang gibato sa iyang silingan, nilaban ang usa ka lola sa iyang binuhi, gitigbas ang iyang silingan niadtong Biyernes sa buntag sa Brgy. Gen. Climaco, Dakbayan sa Toledo.

Si Maria Mae Briones, 22, samdan sa duha ka mga kamot, human tigbasa ni Editha Tabios, 62, kinsa nadakpan sa kapulisan nga niresponde.

Si Police Staff Sgt. Reno Allego sa Toledo Police station nga nahinabi sa Superbalita Cebu, nibutyag nga si Tabios niagi sa balay ni Briones.

Apan kalit nga nitiyabaw ang binuhing iro ni Tabios human gibato sa anak ni Briones. Nasuko si Tabios, nilaban sab sa iyang anak si Briones.

Nagkalalis sila si Briones ug Tabios, nasuko ang tiguwang, gitigbas ang biktima gamit ang sundang. Swerte si Briones kay wa maigo sa ulo, ang iyang duha ka mga kamot maoy nasamdan sa iyang pagsige og sagang.

Dugang nasayran sa kapulisan nga si Tabios daan na usab nga may kalagot sa bana ni Briones.

Ang bana ni Briones nitrabaho kang Tabios ug gibayran og P1,500 apan wa tiwasa. Kasong attempted homicide ang ipasaka sa kapulisan karong Lunes batok kang Tabios. / GPL