NAKADESISYON ang mga nagpasiugda sa 2020 Private Schools Athletic Association (Prisaa) National Games nga hingpit na’ng kanselahon ang pagpahigayon sa kompetisyon gumikan sa pagkuyanap sa coronavirus disease (Covid-19).
Ang PRISAA National Games, nga gikatakda unta karong Abril 15-24, 2020 sa Tuguegarao City, maoy labing ulahing mayorihiyang kompetisyon sa nasod nga nakanselar.
Gumikan niini, si University of San Carlos (USC) track and field coach Arvin Loberanis misugyot na lang sa iyang student-athletes nga mopauli na lang una sa ilang tagsatagsa ka probinsya gumikan kay gawas nga nakanselar ang kompetisyon, gisuspenso man sab ang mga klase.
“I told my college students to go home to their hometowns so that they will be with their families in case of a lockdown,” asoy ni Loberanis sa interbyu sa Sun.Star Cebu, igsuong buhatan ning mantalaan.
Ang mga atleta sa Sugbo mao ang ningdominar sa Prisaa Regionals nga gipahigayon sa dakbayan sa Sugbo sa miaging semana.
Ang mga medalists unta ning maong panagtigi mao ang morepresentar sa Rehiyon 7 alang sa national competition.
Ang Prisaa National Games usa ka tinuig nga kompetisyon alang sa college ug high school student-athletes gikan sa pribadong mga tunghaan.
“Since there are no more events to compete for this calendar year, I just advised them to go home,” dugang ni Loberanis, kinsa midugang nga wala sab sila’y eskedyul sa praktis ning panahuna.
Matod ni Loberanis nga mobalik ra sila og praktis sa sunod na school year karong Agusto.
Sa wala pa ang Prisaa, unang gikanselar sa Department of Education ang Palarong Pambansa ug ang regional qualifying niini nga mao ang Central Visayas Regional Athletic Association (Cviraa) Meet.
Ang coronavirus, nga nagagikan sa Wuhan, China, nakaapekto na sa 145,000 ka mga personalidad sa tibuok kalibutan diin 5,000 na ang ningpanaw.
Ang Pilipinas adunay 64 ka mga kompirmadong kaso sa Covid-19 diin walo na ang ningpanaw basi sa taho kagahapon. / RSC, ESL