NANAWAGAN karon ang mayor sa lungsod ngadto sa publiko nga mag-amping sa lugar tungod sa pipila ka mga persons under monitoring (PUMs) ug persons under Investigation (PUIs).
Gitataw ni Mayor Quilin Sarte nga angayang magpabiling kalma ug di mag-panic ang publiko inay mahimong alerto sa pagbantay batok sa coronavirus disease (Covid-19).
Subay sa gipaguwang advisory sa Municipal Health Office (MHO) sa social media, gitataw niini nga adunay 17 ka mga tawo nga nalista isip PUM apan ang tulo niini nakahuman na sa 14-days quarantine ug walay nakitang sintomas sa Covid-19 kanila.
Aduna say unom ka mga tawo nga gipailawom sa PUI apan wa pay miguwang resulta sa ilang eksaminasyon medikal.
Giawhag sa mayor ang tanang mopauli sa lugar kon nagagikan sa mga nasud nga adunay Covid-19 nga makig-alayon sa MHO ug mopailawom sa home quarantine aron maipalawom sa proseso nga mahimo sab magamit kon mobalik na pag-adto sa laing nasud.
Hinuon wa pa mapaguwa og dugang detalye ang MHO kon hain gidala ang mga PUI ug PUM sa lugar. (Orlando B. Dinoy)