USA ka high-value target nga drug dealer ang napatay sa anti-drug operation alas 5:40 Sabado sa buntag, Marso 14, sa probinsiya sa Maguindanao.
Giila ang suspek nga si Prince Mohammad Uko Mama, 34, minyo, molupyo sa Purok Polindao, Barangay Lower Semba, Datu Odin.
Gibutyag ni Philippine Drugs Enforcement Agency (PDEA) sa Bangsamoro Autonomous Region in Muslim Mindanao (Barmm) Director Juvenal Azurin nga nagpahigayon sila og drug bust duol sa gipuy-an sa suspek.
Sa dihang akto na nga itunol ni Mama ang shabu sa asset sa PDEA-Barmm nakamatikod siya nga mga awtoridad ang iyang ka-transaksiyon. Hinungdan nga mihulbot kini sa iyang armas ug nagpabuto punting ang mga tinugyanan sa balaod.
Napugos ang grupo ni Azurin nga pusilon si Mama hinungdan nakaangkon siya og upat ka samad sa lawas.
Nadala pa si Mama sa Cotabato Regional and Medical Center (CRMC) apan gideklarang dead on arrival.
Narekober sa posisyon sa suspek ang lima ka pakite sa shabu, usa ka kalibre .45 nga pistola, mga bala, usa ka magazine ug mga drug paraphernalia.
Gikompirma sab ni Azurin nga niadtong miaging tuig nadakpan na si Mama apan nakapiyansa ug nakagawas nga nalambigit sa illegal drug trade sa Cotabato City ug Maguindanao. (EEF)