Misa sa simbahan, kapilya kanselado

Misa sa simbahan, kapilya kanselado

DUNA nay parokya sa Archdiocese sa dakbayan sa Davao ang nagkanselar na sa ilang pagsaulog sa Santos nga Misa sa simbahan ug mga Kasaulogan sa Pulong (KSP) sa mga kapilya kon diin tambongan sa daghang mga tawo.

Kini subay na sab sa guidelines nga gipahimutang sa mga barangay ug sa suwat-pastoral sa Catholic Bishops’ Conference of the Philippines (CBCP) may kabahin sa pagbatok sa coronavirus disease 2019 (Covid-19).

Usa sa mga parokya nga di na magsaulog sa Santos nga Misa sa simbahan ang San Isidro Labrador Parish sa Barangay Catalunan Grande, sugod Sabado, ilabi na sa anticipated mass sa alas 6 sa gabii, Sabado, Marso 14.

Sa mensahe nga gipadangat sa parokya ngadto sa mga parish ministry coordinators, zone coordinators gikan sa nagkadaiyang ministriya pinaagi sa messenger, gipahibawo ang tanan nga sugod kagahapon sa hapon, Marso 14, wa nay saulogon nga anticipated mass ug wa na say KSP sa tanang Gagmay’ng Kristohanong Katilingban (GKK).

Ang tanan gitambagan nga mosunod sa Barangay Catalunan Grande Guidelines alang sa Covid-19.

Samtang sa Diocese of Tagum, kon diin nahilakip sab ang onse ka mga lungsod sa probinsiya sa Davao de Oro, kanselado na ang tanan nilang pagsaulog sa Santos nga Misa sa tibuok arkdayosis sugod karong adlawa, Marso 15, 2020, subay sa sulat-pastoral sa (CBCP), pinaagi kang Bishop Medel S. Aneo, arsobispo sa dayosis, pinetsahan Marso 14, 2020.

Unod sa maong sulat nagbutyag nga ang tanang katawhan nga layko gihatagan sa dispensasyon sa dili una pagsimba sa matag Dominggo, mga piyesta ug mga kalihukan sa kwaresma.

Apan gihangyo ang tanang katawhan sa pagpuasa, ilabi na matag adlaw’ng Biyernes sugod Marso 20 hangtud sa Biyernes Santo isip adlaw sa pag-ampo ug pagpuasa.

Dugang sa maong sulat, ang pagmando sa mga kaparian nga magpadayon sa pagsaulog sa Santos nga Misa nga wala ang presensiya sa katawhan sa matag parokya diha sa ilang sakristiya o di ba kaha sa usa ka pribadong kapilya o kilid sa altar sa simbahan.

Dugang pa nga ang Diocesan Catholic Schools o DOTES wala na usab pahitabuong “baccalaureate masses” ug mga Moving Up, ingon man Graduation Ceremonies o Commencement Exercises.

Nag-awhag usab si Bishop Aneo sa katawhan nga likayan una ang tanang kalihukan sama sa recollection, asembliya, conferences, mga prusisyon communal station of the cross ug uban pang kalihukan diin daghan ang mosalmot.

Giawhag sa suwat-pastoral ang tanang parokya nga matag alas dose sa udto ug alas otso sa gabii pagabagtingon ang mga lingganay ug pangadyeon sa matag pamilya sulod sa ilang tagsa-tagsa ka mga panimalay ang Oratio Imperata mahitungod niining pagkuyanap sa Covid-19.

Ug gidasig usab ang mga pamilya sa pag-ampo sa Santos nga Rosaryo matag alas otso sa gabii dinagkutan ang cadelaria agi’g pahinumdom sa katawhan nga bisan taliwala niining pagsulay nga nahitabo karon anaa si Kristo nga maoy kahayag ug kaluwasan.

Ning panahon sa kwaresma, ilabi na sa adlaw’ng Biyernes, gihangyo ni Aneo ang tanang pamilya sa pagpamalandong sa dalan sa krus (station of the cross) sulod sa ilang mga pinuy-anan.

Ang maong mga giya suma pa magpabilin hangtud nga ideklara sa nasyonal nga paggamhanan nga nakalingkawas na kita sa krisis sa Covid-19.

Dako ang paglaum ug pagtuo sa obispo nga masulbad ra kining maong problema sa Covid-19 ug gihangyo ang katawhan nga dili ipatigbabaw ang kahadlok sa huna-huna sanglit dili kini makatabang sa kadaghanan, inay mao pa kini ang magsilbing tuburan sa suliran sanglit maghari sa matag-usa ang pag-iya-iyahay susama sa nahitabo nga “panic buying”.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph