KANHI bodyguard ni kanhi Cebu City mayor Michael Rama ang pulis sa Ginatilan nga napatay sa ambush sa sityo Malbog, Barangay Poblacion, Alegria niadtong Miyerkules sa gabii.
Mao kini ang gikompirmar ni Rama sa SunStar Cebu.
Si Rama niingon nga nakaserbisyo kaniya si PO3 Jonathan Tilos niadtong 2012-2013.
Iyang gikondenar ang pagpatay kang Tilos.
Samtang nagpatabang kang Cebu City Councilor Dave Tumulak si Tilos nga makabalik sa Cebu City Police Office (CCPO), matod sa taho sa TV Patrol sa ABS-CBN.
Si Tilos, 36, taga Barangay Tisa, Cebu City, giingong padung sa usa ka fitness gym sa sitio Malbog, apan adunay gikalalis nga wala mailhing lalake sa wa pa ang hitabo.
Dihang nigawas siya sa gym, gipaarakan siya sa usa ka tawo, kinsa nisibat human sa hitabo sakay sa usa ka sakyanan.
Dead on arrival si Tilos sa tambalanan tungod sa kadaghan sa mga samad nga iyang naangkon, usa niini sa agtang.
Narco police
Nalakip sa listahan sa narco policeman si Tilos.
Matod ni Cebu Provincial Police director Sr. Supt. Manuel Abrugena nga gawas nga nabutang siya sa listahan sa mga pulis nga nalambigit sa illegal nga drugas, giingong higala usab kini ni Franz Sabalones.
Si Sabalones ang ginganlan ni Presidente Rodrigo Duterte nga usa sa labing dako nga drug lord sa Central Visayas.
“Included sya doon sa list sa narco policeman sa governments list po, na kasama dyan ang mga barangay captains, mayors governors. Yun po ang tinutokoy dyan,” matod ni Abrugena.
Sa pagpusil, giila na nila nga person of interest kadtong lalake nga gikalalis niini sa wala pa mahitabo ang pagpamusil.
Personal nga atraso ang gisubay sa mga imbestigador sa Alegria police station ug sa Cebu Provincial Police Office sa motibo sa krimen sanglit daw sa managkaila ra sila si Tilos ug ang mao nga lalake.
Apan wa usab nila wad-a ang posibilidad nga adunay nagpaluyo nga illegal nga drugas sa maong hitabo human masuta nga nalakip si Tilos sa narco list nga naa sa usa sa mga ahensya sa gobiyerno.
Lakip sa ilang tan-awon ang kinabuhi niini human makadawat og kasayuran nga buwag na kini sa iyang legal nga asawa.
Tuig 2006 nasulod sa pagka pulis si Tilos diin ka batch niya si anhing Police Senior Inspector Raymond Hortezuela nga bag-o lang napatay sa mga sakop sa Counter Intelligence Task Force sa syudad sa Mandaue sa gihimong buy bust operation.
Apan matod ni Abrugena nga way koneksyon ang nahitabo kang Hortezuela ug Tilos.
Sa hulagway nga gi post sa Facebook ni Jessa Mae Jabil, iyang gipakita ang pula nga Toyota Hilux ni Tilos nga natusaktusak na sa mga bala ug ang lawas niini nag buy-od na sa kilid sa karsada.