GIPAPAULI ni University of San Carlos Track and field coach Arvin Loberanis ang iyang mga atleta sa ilang tagsatagsa ka probinsiya human nga gipangkanselar ang mga duwa ug gipangsuspenso usab ang mga klase tungod sa coronavirus (Covid-19) pandemic.
Ang 2020 Private Schools Athletic Association (Prisaa) National Games, nga gikatakda unta sa Abril 15 ngadto sa 24, 2020, sa Tuguegarao City, maoy uwahing event nga gikanselar niadtong Biyernes sa gabii human sa panagtigom sa officials ug representatives.
Ang Cebu athletes midominar sa Prisaa Regionals nga bag-o lang gipahigayon sa Cebu City. Mga medalist sa maong panagtigi mao ang molangkob sa Region 7 delegates aron misakbang batok sa mga nag-unang atleta usab sa mga nagkalainlaing rehiyon.
Kining tinuig nga kompetisyon alang lang sa mga college ug senior high school athletes sa private schools, colleges ug unibersidad.
Dugang niya nga ang training mobalik lang sa sunod school year nga mosugod sa Agusto.
Gawas sa Prisaa, ang Department of Education mikanselar nang daan sa Palarong Pambansa ug regional qualifying sama sa Central Visayas Regional Athletic Association (Cviraa) Meet.
Ang Covid-19 nga nagagikan sa Wuhan, China mipakgang usab National Basketball Association (NBA), Boston Marathon, boxing promotions ug uban pang mga dagkong event didto sa Estados Unidos. (JBM, RSC)