Curfew sa Lapu-Lapu ipatuman; kamandoan batok Covid-19 giluwatan

Lapu-Lapu City Mayor Junard "Ahong" Chan. (SunStar file photo)
Lapu-Lapu City Mayor Junard "Ahong" Chan. (SunStar file photo)

NIPAGAWAS og tulo ka executive order si Lapu-Lapu City Mayor Junard "Ahong" Chan Dominggo sa gabie, Marso 15, isip dugang lakang batok sa nagpadayong hulga sa coronavirus disease (Covid-19).

Pipila sa mga kamandoan sa mayor mao ang pagpatuman og curfew alang sa tanang residente sa dakbayan gikan alas 10 sa gabie hangtod alas 5 sa buntag nga magsugod Lunes, Marso 16.

Ang mga apektadong trabahante gikinahanglan nga magpakita og company ID o certification.

Sulod sa maong curfew, gidili na ang pag-inom sa pampublikong lugar sama sa mga convenience stores.

Gimandoan usab ni Chan ang mga business establishments sa dakbayan sama sa mga mall, internet cafe, stalls sa merkado, casino, ug uban pa nga manirado sa alas 8 sa gabie.

Gipahibalo sab sa mayor nga did-an na ang mga tinun-an nga magduwa og online games o magtan-aw og salida sa mga internet cafe. Kadtong mga tinun-an ra nga adunay akademikong tuyo ang tugotan.

Sirado na usab ang tanang mga rehistradong buwangan sa dakbayan ug gidili na ang karaoke sa pampublikong lugar hangtod ilibkas ang public health emergency sa nasud.

Lakip sa mando ni Chan ngadto sa mga hotel, pension house, ug resort ang pagpaubos sa mga langyaw nga turista nga bag-ong abot sa 14-day quarantine ug siguruon nga dili kini makagawas sa ilang mga kwarto.

Sugod sab karong Marso 17 dili na makasulod sa dakbayan ang mga domestic passengers sa Mactan-Cebu International Airport (MCIA) sulod sa 30 ka adlaw. Samtang sugod Marso 18 gikinahanglan na nga ipaubos sa 14-day quarantine ang tanang international passengers sa maong tugpahanan.

Niadtong Biyernes, Marso 13, gisuspenso ni Chan ang klase sa tanang lebel sa pampubliko ug pribadong tunghaan sa dakbayan sugod Marso 14 hangtod Marso 28 tungod sa nagpadayong hulga sa Covid-19.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph