DILI nato hingpit mahulagway kon unsa kagrabe ang epekto sa ekonomiya sa nasod tungod sa nagkataas nga hulga sa Covid-19 sa tibuok kalibotan. Daghang kompaniya ang nanira o nanaktak og trabahante tungod sa dakong alkanse sa ilang operasyon labi na sa tourist-oriented nga estabilisemento tungod sa kalit nga pagkunhod sa mga turista o mobiyahe.
Karon nga daghan nang local government units (LGU) sa tibuok nasod nga nideklarar og community quarantine o misira sa mga dumuduong, mas milapad ang kadaut sa tanang negosyo.
Unsay pagpangandam sa kagamhanan sa impact sa Covid-19 sa ekonomiya? Sa pagkakaron, ang kagamhanan atong masinati nga nakatutok pag-ayo sa pagsubay sa mga tawo dunay simptomas sa sakit.
Mas maayo mohimo usab og dungan nga plano nga unsay buhaton o pagpangandam sa ekonomiya nga dili hingpit molahos sa pagkatikyaob sa kaalautan bisan matapos o kontrolado na ang krisis sa Covid-19.
Usa sa mga business leader, Sabin M. Aboitiz, presidente sa Aboitiz Group ug CEO, nagtuo nga mahanigan ang ekonomiya sa nasod sa panag-uban sa kagamhanan ug pribadong sektor nga motutok sa duha ka bahin sa kolaborasyon: pagpadayon sa pag-uswag sa ekonomiya ug pagsuporta sa Covid-19 information campaign sa kagamhanan.
Ang pagpatuman sa government and private sector-led infrastracture projects mahimong mosagang sa impact sa Covid-19, matod ni Aboitiz sa briefiing sa financial analysts.
Si Finance Secretary Carlos G. Dominguez III niingon nga ang Build, Build, Build program sa kagamhanan “.. is the right thing to do” aron daghang makatrabaho ug mopalit og lokal nga materyalis aron motuyok ang lokal nga ekonomiya.
Saktong ang LGUs sa lockdown o community quarantine apan kinahanglan mokonsiderar usab sa impact sa pamatigayon.