GIDEKLARAR sa Cebu City Government kagahapon, Dominggo, Marso 15, atol sa press conference sa City Hall ang state of general community quarantine sa tibuok dakbayan hangtod sa Abril 14 nunot sa hulga sa coronavirus disease 2019 (Covid-19).
Si Mayor Edgardo Labella nilagda og Executive Order no. 052 alang sa pormal nga pagpatuman sa mga angay nga buhaton aron mabatukan ang pagsulod sa gikahadlokan nga sakit.
“Cebu City residents are strongly advised to stay in their homes and maybe only come out for work, to buy food, medicines and necessary supplies and to go to medical areas and other public areas if they do not have any important transactions, business or otherwise,” tipik sa EO ni Labella.
Ang mga mall, recreational center, community center ug ubang commercial areas gimanduan usab nga limitahan ang ilang oras pag-abli hangtod alas 8 sa gabii ug sa maong oras, epektibo na usab ang curfew hangtod alas 5:00 sa kaadlawon.
Ang suspensiyon sa klase inay hangtod ra sa Marso 28, gilugwayan kini ni Labella hangtod sa Abril 14.
Panahon sa community quarantine, kini ang nag-unang ipatuman sa kagamhanan:
• Ipahigayon ang health checkpoints nga gipangulohan sa Cebu City Police Office (CCPO) inabagan sa Central Command
• Mopahigayon usab og checkpoint sa mga entrada paingon sa Cebu City lakip na ang North ug South Bus Terminals.
• Magpadayon ang ilang general disinfection ug information campaign bahin sa Covid-19.
Giklaro sa mayor nga dili lockdown ang iyang gipatuman ug makasulod ug gawas gihapon ang mga residente sa siyudad ug kadtong mga nagpuyo sa ubang local government units sa Metro Cebu ug sa lalawigan sa Sugbo, apan moagi pa sila og interview gikan sa awtoridad.
Iyang giawhag ang mga tawo nga magdala og identification cards sama sa company ID ug uban pa.
“Sea ports within the jurisdiction of the City Government are hereby declared closed to passenger arrivals except for cargo deliveries of essential goods. However, those who are in transit upon the effectivity of this EO will be allowed to dock but shall be subjected to quarantine protocols as prescribed by the DOH,” dugang sa EO 052.
Gikanselar usab sa mayor ang concert, cockpit operations, fiesta celebrations ug ubang pang kalihukan nga adunay panagtapok sa daghang mga tawo.
Padayon gihapon ang public transportation apan kinahanglan nga motuman sa social distancing nga gimando sa Department of Transportation.
LAPU-LAPU CITY
Nipagawas og tulo ka executive orders si Lapu-Lapu City Mayor Junard "Ahong" Chan kagahapon, Dominggo, Marso 15, isip dugang lakang batok sa nagpadayong hulga sa Covid-19. Kini epektibo sud sa 30 ka adlaw.
Pipila sa mga kamandoan sa mayor mao ang pagpatuman og curfew alang sa tanang residente sa tibuok dakbayan sugod alas 10 sa gabii hangtod alas 5 sa buntag.
Ang mga apektadong trabahante, gikinahanglan magpakita og company ID o certification.
Gidili na ang pag-inom sa pampublikong lugar ug gawas sa mga convenience stores sulod sa curfew hours.
Gimandoan usab ang business establishments sa dakbayan sama sa mga mall, merkado, casino, ug uban pa nga manirado sa alas 8 sa gabii.
Sirado na usab ang tanang mga rehistradong buwangan sa dakbayan hangtod ilibkas ang public health emergency sa nasod.
Lakip sa mando sa mayor ngadto sa mga hotel, pension house, ug resort nga ipaubos sa 14-day quarantine ang mga langyaw nga turista nga bag-ong abot ug siguruon nga dili kini makagawas sa ilang mga kwarto.
Ug sugod karong Marso 17, dili na makasulod sa dakbayan ang domestic passengers sa Mactan-Cebu International Airport (MCIA).
Samtang sugod Marso 18, gikinahanglan na nga ipaubos sa 14-day quarantine ang tanang international passengers sa MCIA.
UPDATE SA COVID-19
Gikompirmar sa Department of Health nga tulo ka mga pasyente nga adunay Covid-19 ang nipanaw kagahapon, Dominggo, Marso 15.
Ang mga namatay mao sila Patient 9 (PH9), PH54, PH39. Nunot niini, niabot na sa 11 ang tanang namatay tungod sa Covid-19.
Si PH9 usa ka 86 anyos nga lalakeng Amerikano, si PH54 usa ka 40 anyos nga lalakeng Filipino nga taga Pasig City, samtang si PH39 usa ka 64 anyos nga lalakeng Filipino nga taga Negros Oriental.
Gipahibawo sab sa DOH nga adunay dugang 29 ka kaso sa Covid-19 ang ilang natala ug niabot na sa 140 ang tanang kumpirmadong kaso sa nasud. (Dugang ni NDT)