COTABATO CITY -- Narekober sa mga sundalo ang tulo ka patay nga lawas sa mga armadong grupo alas 4:00 sa hapon niadtong adlaw nga Sabado sa probinsiya sa Maguindanao.
Nailhan ang mga napatay nga sila Abdul Dinas, Mosani Lomen ug Pendih Sanggutin, mga sakop ni Kumander Salahudin Hassan sa Bangsamoro Islamic Freedom Fighters (BIFF).
Gibutyag ni 601st Brigade Commander Colonel Jose Narciso nga nakaplagan ang patay nga lawas sa BIFF pinaagi sa Joint Task Force Central sa utlanan sa Datu Hoffer ug Ampatuan Maguindanao.
Napatay ang mga rebelde atol sa gilusad nga air to ground assault sa militar sa bukiran nga dapit sa Datu Hoffer ug Ampatuan.
Gikompirma sab sa mga lokal opisyal sa Ampatuan Maguindanao nga si Dinas pag-umangkon ni Kumander Salahudin Hassan nga tuong kamot ni Shiekh Esmail Abdulmalik alyas Kumander Abu Toraife.
Muabot na sa 21 ang napatay ug upat sa militar sa nagpadayon nga focus military operation sa Maguindanao.
Narekober sa lugar ang mga Improvised Explosive Device (IED), mga armas, mga bala, mga kagamitan sa paggama og bomba.
Padayon nga gilutos sa Joint Task Force Central ang BIFF sa bukiran nga parte sa utlanan sa Datu Hoffer ug Ampatuan Maguindanao.