KIDAPAWAN CITY -- Tungod sa pagkuyanap sa sakit nga Coronavirus Disease 2019 (Covid-19), magpatuman og hugtanon nga profiling ug massive disinfectant ang probinsiya sa Cotabato.
Atol sa panagpulong sa mga barangay officials, nagkasinabot ang mga pribado nga sektor ug lokal nga kagamhanan sa Midsayap Cotabato nga magpatuman og lapad nga disinfectant ug profiling.
Ipailawon usab ang tanan nga molopyo sa Midsayap nga miuli gikan sa kaulohan ug kadtong mga Overseas Filipino Workers sa profiling kon aduna kini sintomas sa Covid-19.
Lakip na kadtong mga tawo nga Patients Under Investigations (PUIs) ug Person Under Monitoring (PUM).
Magpatuman usab og massive disinfectant kadtong mga dapit nga sagad magtapok ang mga tawo susama sa merkado, publiko, mall, simbahan, basketball gym ug uban pa.
Mismo nga si kanhi Cotabato 1st District Board Member Rolly Sacdalan ug RHU-Midsayap ang nagpasabot sa sakto nga disinfectant batok Covid-19.
Naghangyo usab si Sacdalan nga inay maglaag-laag sa balay na lang aron makalikay sa Covid-19.
Nanawagan si Midsayap Mayor Romeo Araña sa katawhan nga maghiusa aron dili matapdan sa Covid-19 ug sabton ang panawagan sa LGU gumikan kini alang sa kaayohan sa tanang katawhan.