TUNGOD sa way kasiguruhan kung unsa pay posibleng dangatan sa nagkadaghang kaso sa Covid-19, gipailawom na sa Community Quarantine ang tibuok Davao City subay sa Executive Order No. 10 Series of 2020, kagahapong adlawa, Marso 15.
Matod ni Davao City Mayor Sara Duterte-Carpio nga di na angay nga huwaton pa nga adunay magpositibo sa Covid-19 una ipatuman ang kamanduan.
Ang mayora nanagana ng daan alang sa kahimtang ug seguridad sa panglawas sa mga taga Davao nga malayo kini sa virus.
Uban sa kamanduan mao ang paglatag sa nagkadaiyang sumbanan nga mamahimong sundon sa pagpatuman sa kamanduan.
Ubos sa kamanduan, gidasig ang publiko nga magpabiling sulod sa panimalay, mogawas ra kung motrabaho, o dunay importanteng lakaw sama sa pagpalit og pagkaon, medisina, ug moadto sa ospital o molabay og basura.
Gidid-an na usab ang tapuk-tapok lakip na ang klase sa kindergarten ug post-graduate studies.
Kini magpabilin hangtud ilibkas na ang State of Public Emergency nga una ng gideklarar ni Pres. Rodrigo R. Duterte.
Suspendido na usab ang tanang religious activities diin kahinumduman kini nga gipagula niadtong Sabado.
Gibutyag ni Davao City Archbishop Romulo Valles nagkanayon nga kanselado na ang Misa, diin sagad sa mga simbahan i-agi na lang sa live streaming ang pagpahigayon sa misa.
Taliwala sa Community Quarantine, anaa gihapoy trabaho ang mga opisina sa gobyerno.
Kinsa man kadtong mga empleyado gikan sa ubang probinsiya mamahimo gihapon nga makasud sa Davao, apan adunay screening procedure nga pagahimuon ug sundon.
Gi-awhag usab ang mga pribadong kompanya nga mag-andam ug mopatuman sa flexible workplan alang sa ilang empleyado.
Sa pagpamalit og produkto, gi-abisohan ang tanan nga mogamit og serbisyo ug mamalit og pagkaon pinaagi sa online gikan sa lokal nga mga suppliers.
Mamahimo usab nga gamiton ang online meetings ug bank transactions.
Hinuon, gisiguro nga anaa gihapon ang public transportation, lakip na ang cargo deliveries.
Sa laing bahin, aron tiunay nga makontrola ang pagkuyanap sa virus dinhi, niluwat og executive order si Davao City Mayor Sara Duterte nga nag-banned sa flight gikan Clark International Airport paingon Davao City.
Base sa EO No. 09 Series of 2020, nga angay sundon ang IATF Resolution 11 nga nagdili sa pagbiyahe pasud ug pagawas sa Metro Manila bisan pa man og miagi sa Clark International Airport.
"Doctors want to contain everything in Metro Manila, and yet Manila passengers are allowed to fly out of Clark to Davao City. Please rethink what you are doing. Sunduon sa Gensan padung sa Davao," suma sa mayor sa iyang Instagram account.
Gawas niini, gimanduan usab ang mga mayor sa silingang lungsod sa dakbayan nga molihuk ug mohimo na og kaugalingong PUI quarantine sa ilang dapit.
"I am asking Mayors of other LGUs na kapitbahay namin gumawa na kayo ng PUI quarantine area ninyo. Otherwise, I will close Davao City and you will have no access to hospitals and other essential services. Nagsasakripisyo na ang Davao City ng walang lockdown para sa inyo, gumawa naman kayo ng action."
Lockdown
Apan, sa posibilidad nga mas mograbe pa ang kahimtang, atol sa radio guesting ni Mayor Duterte sa 87.5 Disaster Radio, Dominggo, gisulti sa mayora nga andam ang siyudad sa pagpatuman sa lockdown.
"Incase ipatuman nato ang lockdown, giandam na nato ni para sa daan, naa nay guidelines para mahibalo na tanan daan unsa ang posibleng mahitabo." RGV