SIKOP sa entrapment operation ang usa ka giingong kanhi ombudsman investigator kagahapon Marso 13 sa Max Suniel Street, Barangay Carmen ning siyudad sa Cagayan de Oro.
Ang suspetsado nailang si Jonathan Pineda, giingong instructor usab, 47, ulitawo, taga Gold City, Barangay Balulang ning siyudad.
Sa impormasiyon gikan sa kapulisan sa Cagayan de Oro City Police Office (Cocpo) nga nasikop sa entrapment operation ang suspetsado human nga gireklamo sa pagpangilkil sa usa ka police recruits gikan sa Regional Training School (RTS).
Gikabutyag nga nangayo kini og P30,000 bugti sa pag-drop sa kaso nga gipasaka batok sa police recruit nga nakasala human nakigsinumbagay sulod sa maong training school.
Gikumpirma kini ni PCapt. Ernesto Sanchez, hepe sa Police Station 2 (PS2) sa Cogon.
"To settle the ombudsman case filed against the Police recruits who committed an offense inside the training school nga fist fight. With his intervention daw ang kaso ma drop," matud ni Sanchez.
Ang suspetsado ang kasamtangang anaa na karon sa kustodiya sa kapulisan ug gitakdang ipasaka sa adlaw nga Lunes ang kasong robbery extortion.