TALAGSAON ra mahitabo nga dili madayon ang importanteng kasaulogan sa dakbayan. Karon ra tingali mahitabo nga human sa sobra 80 ka tuig nga kasumaran sa kamugnaan sa "Mutyang Lungsod ng Davao" wala gisaulog sa mga Dabawenyo ang Araw ng Davao.
Mangutana una kita sa mga batid sa atong kasaysayan kung karon ra ba gayod kini nahitabo? Bisan sa nangaging katalagman sa atong lugar wa ko makahinumdom nga gi-oktaba o gihunong ang pagsaulog niini isip paghandom sa pagkahimugso sa atong lungsod nga nakapatumaw og usa ka Presidente sa Pilipinas.
Niadtong niaging semana nagpaguwa og kamanduan si Mayor Sara Duterte-Carpio nga pakusgan ang pagbantay sa pagkuyanap sa virus nga nahimo nang sakit nga coronavirus disease (Covid-19).
Gipahunong ang tanang aktibidades nga magpatapok sa tawo sama sa gradwasyon sa eskwela, komperensiya, pagsaulog sa Santos nga Misa, ug uban pa, apil na niini ang pagbiyahe ngadto sa gawas ug pabalik sa Davao.
Naglatid sab kini og giya nga unta sundon natong tanan kay kung mosipyat, kita ra usab ang mabasol. Dunay hungngihong nga anaa nay mga pasyente nga positibo sa Covid-19 sa Davao del Norte ug hasta ang Davao City apan dili pa kini nato makumpirma kay ang Department of Health ra gayod ang ahensya sa gobyerno nga makasulti niini.
Ang numero uno nga buhaton nato mao ang pagbaton og kinaiya nga masunuron sa mando sa eksperto sa panglawas. Likayan ang pag-panic sama sa pagpamalit og sobrang gamit sa balay sa kahadlok nga mahutdan.
Hastang daghana sa nagpunsisok sa grocery stores kay ilang gipakyaw ang alcohol, hand sanitizer, mga bitamina hasta ang pagkaon sa kahadlok nga mag-lockdown ang dakbayan sama sa nahitabo sa Metro Manila.
Wala na unya'y biyahe pagdulong og pagguwa sa Davao mao nga mintras may panahon pang mamalit, mopalit na daan o kaha mopauli sa ilang probinsiya og didto magbantay sa katikaran sa palibot sama sa pagpaminaw sa radyo, motan-aw og TV o sa internet.
Ambot kaha kung makaabot pa ang dyaryo sa inyong lugar kay hasta ang among mga "newsboy" nakatabon sab sa ilang nawong aron dili matakdan sa makalilisang nga sakit. Ang kanhi puno nga dalan sa siyudad tungod sa Araw ng Davao mora na'g dalan sa panahon sa Biyernes Santo nga gamay ra ang mobiyahe.
Morag kantang karaan nga "Kamingaw sa Payag" nga way kisaw og ang tingog sa gangis ug mangloy na lang ang madungog. Hasta ang atong mga kahayupan sama sa iro, iring, baboy, kanding, ug manok nakigduyog sa kahadlok nga matakdan sa sakit.
Bawal tingali kanila ang biso-biso, halog-halog ug tilaptilap kay wala daw santohon sa maong sakit. Nahadlok sab tingali sila nga maoy matripan nga ihawon kung wa nay sud-anon o sumsuman sa inom.
May mga palahubog nga nanganti nga di daw sila taptan og Covid-19 kay mamatay ang virus sa bino. Naa puy nag-ingon nga saging, virgin coconut oil, kalamunggay ug uban pang lagutmon ra ang katapat niini.
Sa laing bahin, dili nato baliwalaon ang maong sakit ug unta makakita na'g tambal alang niini. Kalma lang kita ug mag-ampo sa kanunay.