BANSALAN, Davao del Sur -- Gihimong panginabuhian sa ubang mananahi sa lugar ang paghimo og face mask gamit ang panapton isip alternatibo tungod sa nagkuwang ang suplay sa surgical mask sa mga botika.
Usa si Edmund Divinagracia, 34, nga nanahi og mga face mask sanglit daghan ang nag-order kaniya human nakasud ang corona virus disease (Covid-19) dinhi sa Pilipinas.
Matud sa mga konsumante nga gikinahanglan gyud nila ang face mask sa takna nga mobiyahe kay gawas nga di mataptan sa mga gipang-ubo, mahimo sab nga proteksiyon sa abog ilabi na nga init na kaayo ang panahon.
Adunay managlahing disenyo ang mga face mask nga mapalit gikan P35-P50 ug mao sab ang giangkat sa ubang negusyante ug gibaligya online.
Bisan ang mga drayber og traysikel sa lugar, migamit na sab og face mask sanglit wa nila masinati ang ilang mga pasahero.
"Wa mi kabalo basin gikan sa laing nasud nga nay Covid-19 among pasahero mao na nga naneguro lang mi," asoy ni Jeff Galeos, 24, drayber og traysikel.
Sa dakbayan sa Digos, nisamot kamingaw ang kadalanan human pipila na lang mga pasahero ang mosakay og traysikel tungod sa kabalaka sa Covid-19.
Sumala ni Cecil Gascon, 25, taga Barangay Matti sa dakbayan, nga mas maayong ipailawom una niya sa self-quarantine ang kaugalingon kaysa mogawas ug magsuroy-suroy sa palibot kay makagasto sab bisan og wa'y hinungdan.
Hinuon, wa pa'y gipatumang lockdown ang siyudad human gihimo na kini sa dakbayan sa Davao ug Tagum, Davao del Norte. (Orlando B. Dinoy)