USA ka pulis nga nalambigit sa illegal nga sugal nga swertres ug ang iyang batabata nasikop.
Nasikop sila sa mga sakop sa Integrity Monitoring and Endorcement Group (Imeg) Visayas Field Unit inabagan sa mga sakop sa Regional Intelligence Division ug Regional Special Operations Group 7.
Ang nadakpan giila nga si Police Staff Sergeant Carlito Tinoy, sakop sa 701st Regional Mobile Force Battalion 7 sa sitio Sudlon, Barangay Lahug, Dakbayan sa Sugbo.
Lakip sa nasikop ang iyang bata-bata nga si Joven dela Cruz Igam, kinsa nakuhaan og mga gamit sa illegal gambling, sama sa kwarta, tally sheet, ug booklet nga adunay number combinations.
Matod ni Police Brigadier General Albert Ignatius Ferro, director sa Police Regional Office 7 (PRO) 7, nga taodtaod na nga nakadawat sila og impormasyon labot sa kalambigitan ni Tinoy sa illegal nga sugal.
Dugang ni Ferro nga base sa ilang monitoring nga consistent ang report kabahin sa giingong kalambigitan ni Tinoy sa illegal gambling, ilabi na sa swertres.
Giingong protector si Tinoy sa illegal gambling hinungdan nga ang Imeg Visayas Field Unit nag-imbestigar dayon. Mag-atubang og mga kasong kriminal ug administratiba si Tinoy dungan sa mando nga parelibohan siya sa katungdanan.
“As your regional director of police regional office, this will serve as a warning to all police scalawags. I’ve told you stop your illegal activities or risk being arrested and jail,” matod ni Ferro.
Gihulagway ni Ferro si Tinoy nga usa ka repeat offender kay daghan nang mga kaso nga nakaung-ong sa Office of the Ombudsman.
Dugang niya nga nadudahan si Tinoy niadto pang 2017, apan karon siguraduhon sa heneral nga ma-dismiss na kini sa serbisyo.
Si Tinoy ang ikaduhang pulis nga nasikop sa Imeg nga gikatahong scalawag ubos sa administrasyon ni Ferro.
Ang una mao ang kanhi hepe sa Argao Police Station kinsa nasakpan nga ni-live in sa usa ka babayeng binilanggo sa illegal drugs. (AYB, BBT)