GIREKOMENDAR ni Gobernador Gwendolyn Garcia sa pag-revoke sa business permit sa mga tindahan nga nagpahimulos sa sitwasyon ug patas-an ang presyo sa bugas ug ubang mga palaliton.
Tungod sa epekto sa pagpatuman na sa four-day work week sa pipila ka mga establisimento sa lalawigan sa Sugbo, sigurohon ni Garcia nga ma-monitor ang sakto nga presyo sa bugas ug ubang mga palaliton.
Usa ka resolusyon ang umolon sa price monitoring council labot niini ilabi na sa mga mag-hoard o magtago og supply sa pagkaon aron masiguro nga maapod ang supply sa tanan.
Gipahibawo ni Garcia atol sa pakighinabi sa mga tigbalita nga igo ang supply sa bugas sa Sugbo sulod sa tulo ka buwan hinungdan nga dili angay nga ma-balaka.
“There’s no reason to hoard. Di kinahanglan nga magpundo ta og bugas kay di ta mahutdan,” matod ni Garcia sa Marso 16, 2020.
Duha ka mga lungsod ang gikatakda nga mo-report sa gobernador labot sa giingong pagsaka sa presyo sa bugas ug ubang mga produkto bisan pa man sa gipatuman nga price freeze.
“Duna man tay mga report gud nga mo- take advantage dayon sa situation, nagmahal dayon ang bugas. Like for example didto sa Barili, pasakaan dayon ang presyo,” matod ni Garcia.
Tungod niini, morekomendar si Garcia og revocation sa mga business permits.
“I think kaning mga mapahimuslanon ba nga nag-atubang pa ta og krisis unya magpahimos na hinuon, I will recommend nga ang ilang business permits i-revoke pod sa ilang tagsa-tagsa ka local government units. We got reports Barili, naay Carcar pod. We’ll see if kinsa ni sila”, matod ni Garcia.
Panawagan ni Garcia nga dili pahimuslan ang labing nagkinahanglan.
“So, I am appealing to all concerned sunod lang ta dili nato himuon nga ang katong nah lisod run mo samot og kalisod. Kahibaw ta nga daghan mga sugboanon karon nga katong nagtrabaho sa mga malls, supermarkets ni shorten na ang pagpanrabaho ang uban leave without pay ang uban gyud gipanangtang na so daghan ron ang naglisod,” matod ni Garcia.
Ipublikar
“What we want to do (is) amo jud na i-publish sa newspaper ang ilang mga nawong ug ilang mga kompanya. We have to let people know what they did and what they are doing. We will shame them publicly.”
Mao kini ang hulga ni Presidential Assistant for the Visayas Secretary Michael Lloyd Dino alang sa mga negosyante nga mopahimulos sa higayon nga mopasaka sa ilang presyo sa palaliton karon nga aduna’y hulga sa Covid-19.
Si Dino aduna’y susamang pahimangno nga gianunsiyo nila ni Garcia ug Cebu City Mayor Edgardo Labella.
Gani, Lunes, Marso 16 dihang iyang gitapok ang PCC inubanan sa Department of Trade and Industry (DTI) ug National Food Authority (NFA) nga dili papaliton kadtong mga retailer og bugas nga wala naandan sa ilahang senemana nga pamaliton. (ANV, HBL)